متیو مېلر: د لوژیستیکي لاملونو له امله مو د ایران د مرستې غوښتنه ونه منله

د امریکا د بهرنیو چارو وزارت ویاند متیو مېلر ویلي، چې ایران په خرابه هوا کې د پخوانۍ ۴۵ کلنې چورلکې د کارولو مسوول دی. نوموړي ادعا کړې، چې د چورلکې له غورځېدو وروسته ایران ترې د مرستې غوښتنه کړې وه؛ خو د لوژیستیکي لاملونو له امله یې د ایران غوښتنه ونه منله.

د امریکا د بهرنیو چارو وزارت دغه ویاند ویلي، ایران خپلې الوتکې د ترهګرۍ د ملاتړ لپاره کاروي.
هغه وایي، د ایران حکومت پر وړاندې به د بنسټیزو ازادیو په برخه کې د ایران د خلکو له مبارزې ملاتړ وکړي او پر دغه هېواد به خپلو بندیزونو ته دوام ورکړي.
د ایران ولسمشر ابراهیم رییسي او د دغه هېواد د بهرنیو چارو وزیر حسین امیر عبداللهیان تېره ورځ د یوې چورلکې د پریوتو په پېښه کې مړه شول.
یوه جګپوړي ایراني چارواکي د نوم نه ښودلو په شرط رویټرز ته ویلي، چې ولسمشر ابراهیم رییسي، د بهرنیو چارو وزیر او په چورلکه کې سپاره ټول مسافر په دې پېښه کې مړه شوي دي.
وروسته ایراني چارواکو هم د ابراهیم رییسي او د هغه د ملګرو وژل کېدل تایید کړل.