حکمتيار: کوم هېواد چې قانون ولري د «رهبرۍ خلا او بې ثباتي» پکې نه رامنځته کيږي

د حزب اسلامي مشر د ایران د ولسمشر او بهرنيو چارو د وزير مړینې ته په اشارې ويلي، په کوم هېواد کې چې «قانون او حکمت حاکم وي هلته د رهبرۍ خلا نه رامنځته» کیږي. په ورته وخت کې د افغانستان د اطلاعاتو او فرهنګ پخواني وزير عبدالکریم خرم هم پر دې پېښه خواشني ښودلې ده.

د اسلامي حزب مشر ګلبدين حکمتیار د دوشنبې په ورځ پر خپله اېکس پاڼه په ایران کې د چورلکي د نسکورېدو په پېښه کې د ولسمشر او بهرنيو چارو وزير وژل کېدو ته په اشاره ليکلي دي: « په هغه هېواد کې چې قانون او حکمت حاکم وي؛ د رهبرۍ هېڅ خلا نشته او نه له یوه لاس څخه بل ته د بې ثباتۍ او کړکېچ لامل ګرځي.»

حکمتيار دا یوه دردناکه پېښه بللې او د ایران حکومت او خلکو ته یې تسليت ويلي دی.

بل لوري بیا نن دوشنبه د افغانستان د اطلاعاتو او کلتور پخواني وزير عبدالکریم خرم هم د ایران پر دې پېښه خواشني ښودلې او پر خپله اېکس پاڼه يې ليکلي دي: «افغانان د ایرانیانو سره په دی غم کې شریک دي.»

د ایران مخکني ولسمشر ابراهیم رییسي چورلکه تېره ورځ د ایران په ختیځ اذربایجان کې غورځېدلې وه، چې تر ۱۶ ساعتونو عملیاتو وروسته نن دوشنبه د چورلکې د غورځېدو په سیمه کې د ایران د لومړۍ درجې چارواکو جسدونه وموندل شول.