امریکا او تاجکستان د «ترهګرو» په څارلو کې همکاري سره کوي
د تاجکستان لوی څارنوال رحمن یوسف زاده او د امریکا سفیر مانویل میکالر په دوشنبه ښار کې د «ترهګرو» د څارنې د سیستم د تطبیق لپاره د خپلمنځي همکارۍ یو تفاهم لیک لاسلیک کړ. د تاجکستان د لوی څارنوال دفتر ویلي چې دا سیسټم اجازه ورکوي، چې د ټیکنالوژۍ له لارې د «ترهګرو» حرکت تعقیب کړي.
د تاجکستان د لویې څارنوالۍ دفتره په خبرپاڼه کې راغلي، چې ښاغلي یوسفزاده او میکالر له افراطیت او ترهګرۍ سره د مبارزې په اړه خبرې وکړې.
د هغو ننګونو او ګواښونو په اړه د معلوماتو تبادله چې د تاجکستان او متحده ایالاتو امنیت تهدیدوي، د دواړو هیوادونو د اتباعو د حقونو او ګټو ساتنه، د افراطیت، تروریزم، سایبري جرمونو او پلاني بین المللي جرمونو مخنیوی او مبارزه د رحمان یوسف زاده او مانویل میکالر ترمنځ د خبرو نور موضوعات دي.
د تاجکستان ولسمشر امام علي رحمان پرون په مسکو کې له خپل روسي سیال سره په کتنه کې وویل، تاجکستان له دېرشو کلونو راهیسې له افراطیت او ترهګرۍ سره مبارزه کوي او دې مبارزې ته به دوام ورکړي.
