پوتین پر نازي جرمني د شوروي د بریا په مناسبت وايي: هیچا ته اجازه نه ورکوو چې روسیه وګواښي

پر نازي جرمني د پخواني شوروي اتحاد د بریا د کلیزې په مناسبت د روسیې ولسمشر ولادیمیر پوتین په دویمه نړۍواله جګړه کې د متحدینو په وروستۍ بریا کې د شوروي اتحاد رول ته په اشارې سره وویل، چې مسکو به د بلې نړۍوالې جګړې د مخنیوي لپاره به هر هغه څه وکړي چې اړتیا یې وي.

د پوتین په خبره، چې که څه هم دوی د بلې نړۍوالې جګړې د مخنيوي لپاره هر ډول لازم اقداماتو ته تیار دي؛ مګر هیچا ته به اجازه ورنه کړي چې روسیه ویجاړه کړي.

پوتین د پنجشنبې په ورځ (د می په ۲۰مه) د مسکو په سره میدان کې یوه لنډه وینا وکړه او ویې ویل، چې د روسیې اټومي وسلې او ځواکونه د تیارسئ په حالت کې دي.

رویټرز خبري اژانس لیکلي، چې د اوکراین د اشغال لپاره د روسي ځواکونو د اکمالاتو له امله سږکال د مسکو په سره مېدان کې د حاضرو سرتېرو شمېر یو ځل بیا کم شوی دی.

د روسیې ولسمشر څرګنده کړه، چې د هېواد راتلونکی د روسیې د پوځیانو په لاس کې دی او ویې ویل: "روسیه له یوه ستونزمن حالت څخه تېرېږي."

پر اوکراین د روسیې د یرغل له پیل راهیسې ناټو او متحدین یې د اوکراین ملاتړ کوي او دغې چارې پر اوکراین د روسیې جګړه اوږده کړې ده؛ خو په وروستیو میاشتو کې د مرستو د کمي له امله په جګړه کې د روسیې د برلاسۍ راپورونه ورکړل شوي وو.

د روانې میاشتې د غويي په اوومه د ناټو عمومي منشي ویلي وو، چې دغه سازمان په وروستیو میاشتو کې له اوکراین سره د مرستې لپاره خپلې ژمنې نه دي پوره کړي. ینس سټولټنبرګ د امریکا د ۶۱ میلیارده ډالرو مرستې تصویب ته په اشارې سره وویل، چې لا زیاتې مرستې په لاره دي او د اوکراین لپاره ډېر ناوخته نه دی چې له روسیې جګړه وګټي.