په برازیل کې د سېلابونو له امله د مړو شمېر ۹۰ تنو ته ورسېد

د برازیل چارواکو ویلي چې په سوېلي ایالت ریو ګرانډې کې د وروستیو سېلابونو له امله د مړو شمېر ۹۰ تنو ته رسېدلی او د ۱۳۱ نورو کسانو برخلیک معلوم نه دی. د مرستندويه ادارو د معلوماتو له مخې د سېلاب له امله ۱۵۵ زره نور کسان بې کوره شوي دي.

ویل کیږي چې په سېلاب ځپلو سیمو کې خلک په سړکونو ویده کیږي او د خوراکي توکو له کمښت سره مخ دي.
په برازیل کې تېره اونۍ سخت بارانونه ورېدلي، چې د سیندونو د ډکېدو، د ښارونو د ډوبېدو او په ټول ښار کې د سړکونو او پلونو د ویجاړیدو لامل شول.
د برازیل ولسمشر په یوه ټلویزیوني وینا کې ویلي، تر هغو چې اوبه کمې نه شي، د سېلاب له امله د اوښتو زیانونو اندازه نه شي معلومولی.
لوییز اناسیو لولا سوېلي ریو ګرانډې ایالت ته د لا زیاتو دولتي مرستو ژمنه کړې، چې ویل کیږي د اقلیم تر ټولو ناوړه ناورین سره مخ دی.