په رفح ښار کې وروسته له هغه چې اسراییل د سیمې د تخلیې امر کړی، د چاودنو غږونه اورېدل شوي
د سیمې اوسېدونکي وايي، چې د اسراییل پوځ د دوشنبې په ورځ په رفح ښار هوايي بریدونه کړي دي. دغه بریدونه څو ساعته وروسته له هغه شوي، چې اسراییل فلسطینیانو ته ویلي وو، چې د غزې د دغې سویلي ښار له ځینې سیمو دې ووځي.
د غزې په دغو سیمو کې د اسراییل د بریونو له امله بې ځایه شوي له یو میلیون څخه زیات خلک ژوند کوي.
په داسې حال کې چې په قاهره کې د اوربند خبرې اترې ځڼډېدلې دي، په رفح ښار د اسراییل د پراخ برید په اړه اندېښنې زیاتې شوې دي.
اسراییل له ډېر وخت راهیسې په رفح ښار د برید ګواښ کوي او وايي، چې هلته د حماس ډلې د پټنځایونو په وړاندې عملیات کوي.
په رفح ښار د برید په اړه د اسراییل له خوا سمدستي کومه تبصره نه ده شوې؛ خو د حماس پورې تړلې الاقصی ټلویزیون ویلي، چې د رفح ښار ختیځ سیمې یې بمبار کړي، چې وړاندې یې د تخلیې امر شوی و.
د اسراییل پوځ په عربي متن لیکل شویو پیغامونو او له الوتکو څخه د غورځول شویو لارښونو له لارې له خلکو غوښتي، چې له رفح ښار څخه ۲۰ کیلومتره وړاندې هغه سیمې ته پناه یوسې چې دوی یې بشري ساحه بولي.
ځینو فلسطیني کورنیو د تېز باران لاندې دغو سیمو ته تلل پیل کړي دي.
تر دې وړاندې د امریکا په ګډون ګڼو هیوادونو او مرستندویه ډلو اسراییل ته خبرداری ورکړی و چې په رفح ښار برید به د پراخې ملکي مرګ ژوبلې او غزه کې د روان بشري ناورین د لا ژور کېدو لامل شي.
