د یوروویژن سیالۍ د غزې د جګړې له امله د رامنځ ته شوو ګواښونو تر سیورې لاندې پیل شوې
د یوروویژن د ۲۰۲۴ کال د غږ سیالۍ، په غزه کې د اسراییل او حماس ترمنځ د جګړې له امله د رامنځ ته شوو ګواښونو تر سیورې لاندې، د شنبې په ورځ د سویډن په سویل کې د مالمو په ښار کې پیل شوه.
د یوروویژن په سږنۍ سیالۍ کې ۳۷هېوادونه ګډون لري او د دې سیالیو وروستی پړاو به د راتلونکې شنبې په ورځ ترسره شي.
د فرانس خبري اژانس راپور ورکړی چې په دې سیالۍ کې د اسراییل ګډون د غزې د جګړې له امله جنجالي شوی دی.
په ۲۰۲۲ کال کې، په اوکراین کې د جګړې له پیلیدو وروسته، د اروپایی نشراتو اتحادیې د روسی نشراتي شرکتونه، د یوروویژن له نظارت څخه لېرې کړي وو.
د روان کال له پیله، د سږ کال د سیالیو څخه د اسراییلو د ویستلو کمپاین پیل شوی دی.
همدا راز، د مارچ په پای کې د سویسي سندرغاړې نمو مټلر په ګډون د څو هېوادونو سندرغاړو چې د دې سیالیو له ګټونکو څخه دی، په غزه کې د دایمي اوربند غوښتنه کړې ده.
د اسراییل په استازولی دغو سیالیو ته راغلي سندرغاړي ادن ګولان پر ضد هم ګواښونه شوي، چې د اروپايي خپرونو ټولنه یې په غوسه کړې ده.
په مالمو کې د سیالۍ ترسره کولو ځای کې، دغه سازمان د ګډون کوونکو د بیرغونو پرته بل هر ډول بیرغ، او همدارنګه د سیاسي پیغامونو هر ډول بنرونه منع کړی دي.
په ۲۰۲۲کال کې، اوکراینې موسیقۍ ډلې د "سټیفانیا" سندرې پر مټ د ایټالیا په تورین کې د یوروویژن اواز سیالي ګټلې وه.
هر ګټونکی هېواد د راتلونکي کال د سیالۍ کوربه وي، خو دا چې اوکراین د جګړې له امله د سیالۍ کوربه توب نه شو کولی، تېر کال یوروویژن په بریتانیا کې ترسره شو.
سویډنۍ سندرغاړې، لورین د "ټټو" سندرې په ویلو سره دبربتانیا په لیورپول کې د ۲۰۲۳کال د یوروویژن غږ سیالۍ د ۶۷مې دورې ګټونکې شوه.
هغه د یوروویژن په تاریخ کې لومړنۍ ښځه ده چې بیاځلي دا جایزه ترلاسه کوي.
