روانډا ته د لیږلو د ګواښ سربیره ډېری کډوال د مانش کانال له لارې په کښتیو کې بریتانیا ته ځي
روانډا ته د لیږلو له پاره د کډوالو د نیولو له پیل سربیره، لسګونه کسان د شنبې په ورځ په دوو کښتیو کې د بریتانیا سویلي ساحل ته ورسېدل.
دغه پناه غوښتونکي چې ډېری یې نارینه وو، د ډوور بندر ته څېرمه د برتیانیا د سرحدي ځواکونو یوې کښتۍ ته لېږدول شوي دي.
د دغو کښتیو راتګ د بریتانیا لومړي وزیر ریشي سوناک ته یوه ننګونه ده، چې د «ناقانونه» کډوالۍ د مخنیوي او د «کښتیو د بندولو» ژمنه یې کړې ده.
سږ کال تر ۸۰۰۰ ډیر پناه غوښتونکي په کوچنیو کښتیو کې د اروپا له لارې بریتانیا ته راغلي دي.
ریشي سوناک هیله لري چې روانډا ته د ناقانونه پناه غوښتونکو د لیږلو پلان به بریتانیا ته د نورو پناه غوښتونکو د راتګ مخه ونیسي.
د هغه حکومت تمه لري چې روانډا ته لومړۍ الوتنې به په ۹تر ۱۱ اونیو کې ترسره شي.
