چین ته د ناټو سرمنشي خبرداری: دا نه شي کېدای، چې هممهاله لویدیځ او روسیه دواړه درسره وي
د ناټو سرمنشي ینس ستولتنبرګ د پنجشنبې په ورځ وویل:« که چین غواړي له لویدیځ سره ښه راشه درشه ولري، په کار ده چې په اوکراین کې د روسیې د جګړې له ملاتړه لاس په سر شي.»
هغه بیجېنګ ته خبرداری ورکړی، چې نه شي کولای هممهاله دواړه خواوې له ځانه سره ولري.
د ناټو سرمنشي په برلین کې د خپلې کتنې پر مهال ویلي، چې د مسکو د جګړهییزو خوځښتونو په کار کې د پیکېنګ هڅې د پام وړ دي؛ ځکه د روسیې د جګړهییز اقتصاد په پیاوړتیا کې د پرمختللې ټکنالوژۍ مرسته مهمه او حیاتی ونډه لري.
ستولتنبرګ وايي:« تېر کال روسیې خپل ۹۰ سلنه مېکروالکټرونیک له چینه وارد کړي، چې له هغو یې د خپلو توغندیو، شوبلو او الوتکو په تولید او جوړولو کې کار اخیستی. دا رنګه چین هڅه کوي، چې د روسیې د سپوږمکیو پر مټ د ښه تصویر اخیستلو وړتیاوې هم برابرې کړي.»
هغه ګوت څنډنه وکړه:« چین په داسې حال کې چې وايي له لویدیځ سره ښه راشه درشه غواړي؛ خو له دویمې نړۍوالې جګړې وروسته په اروپا کې سترو وسلهوالو جګړو ته هم لمن وهي. هغوی نه شي کولای هممهاله دواړه خواوې خپلې کړي.»
ستولتنبرګ دا رنګه لویدیځو هېوادونو ته هم خبرداری ورکړی، چې د چین په شان دې له روسیې سره ځان نه تړي.
هغه وویل:« په تېر کې موږ دا تېروتنه کړې وه، چې د روسیې پر نفتو او ګازو مو تکیه کړې وه.»
د ناټو سرمنشي زیاته کړه:« موږ ته نه ښايي، چې بیا هغه تېروتنه تکرار کړو. د چین د اومو موادو او ټکنالوژۍ سره زموږ تړاو موږ ته زیان اړوي.»
چین له روسیې سره په وروستیو کلونو کې خپلې سوداګریزې او پوځي اړیکې پیاوړې کړي، ځکه د امریکا متحده ایالاتو پر دواړو خواوو بندیزونه، په تېره بیا پر مسکو یې د اوکراین له جګړې وروسته بندیزونه سخت کړي دي.
د چین د ګمرکونو شمېرې ښيي، چې په ۲۰۲۳ کال کې د چین او روسیې تر منځ سوداګري ۲۴۰ مېلیارډه ډالرو ته رسېدلې چې د تېر کال پرتله ۲۶.۳ سلنه زیاتوالی ښيي او دا رنګه له روسیې څخه د دغه هېواد په وارداتو کې هم ۱۳ سلنه زیاتوالی راغلی دی.
رویټرز تېره میاشت راپور ورکړ، چې د روسیې ولسمشر ولادیمیر پوتین به د چین د ولسمشر شي جېن پېنګ، سره د خبرو لپاره هغه هېواد ته سفر وکړي.
