جوبایډن له اوکراین، اسراییل او تایوان سره د ۹۵ میلیارده ډالرو مرستې سند لاسلیک کړ
د امریکا ولسمشر جوبایډن د چهارشنبې په ورځ له اوکراین، اسراییل او تایوان سره د ۹۵ میلیارده ډالرو مرستې سند لاسلیک کړ او ویې ویل، چې په څو ساعتونو کې به د مرستو استول پیل شي.
په دې لایحه کې له اوکراین سره ۶۱ میلیارده ډالره، اسراییل ته ۲۶ میلیارده او تایوان ته ۸ میلیارده ډالره مرسته شامله ده.
د امریکا د استازو په مجلس کې له څو میاشتو ناندرو وروسته دغه مرستې په ۷۹ موافقو او ۱۸ مخالفو رایو سره تصویب کړې.
ځینو ډیموکراټانو د اسراییل د ملاتړ له بستې سره مخالفت وکړ، په داسې حال کې چې ځینو جمهوري غوښتونکو سناتورانو هم د اوکراین لپاره د مالي بستې مخالفت وکړ او د دې لایحې پر ضد یې رایه ورکړه.
جو بایډن هم یو بل سند لاسلیک کړی، چې له مخې به یې غزې ته د یو میلیارد ډالرو بشري مرستې برابرې شي.
اوکراین په دې وروستیو کې د روسیې د تېري پر وړاندې له لویدیځو هېوادونو څخه د مرستې غوښتنه کړې ده.
دوو امریکايي چارواکو رویټرز ته ویلي، چې بایډن د اوکراین لپاره د یو میلیارد ډالرو پوځي مرستې بسته چمتو کوي.
