سرچینې: اوکرایني بې پیلوټه الوتکو د روسیې د تېلو پر ډیپو او د بریښنا پر مرکزونو برید کړی
کییف کې یوې استخباراتي سرچینې رویټرز خبري اژانس ته ویلي، چې اوکراین د شنبې په ورځ سهار وختي د روسیې پر اتو سیمو د لسګونو «اوږده واټن ویشتونکو بې پیلوټه الوتکو» برید کړی، چې د تیلو یوه ډیپو او د برېښنا درې مرکزونه یې په نښه کړي دي.
دغه برید د روسیې د دفاع وزارت له خوا تایید شوی دی.
اوکراین چې د وو کلونو راهیسې د روسیې د یرغل وروسته د جګړې په ډګر بدل شوی، په دې وروستیو کې له سخت فشار سره مخامخ دی. دغه هیواد هڅه کوي چې د بې پیلوټه الوتکو په کارولو سره دننه په روسیې کې د تېلو د تصفیه کولو او د انرژۍ تاسیساتو په نښه کړي او په دې توګه پر کرملین فشار راوړي.
یوې اوکرایني سرچینې د ټولنیزو رسنیو ویډیوګانو په حواله وویل: «لږ تر لږه درې د برېښنا سب سټیشنونه او یوه د تېلو ډیپو په نښه شوي، او په کې اور لګیدلی دی. د اور لمبې په بېلابېلو سیمو کې ښکاري.»
سرچینې وویل، چې دا تاسیسات د روسیې د نظامي صنعتي تولیداتو د ملاټړ لپاره کار کوي او له همدې امله په نښه شوي دي.
د روسیې دفاع وزارت ویلي، چې د اوکراین ۵۰ بې پیلوټه الوتکې یې په نښه کړي دي، چې ۲۶یې په بلګراد، ۱۰یې په براینسک، اته یې په کرسک، او پاتې نورې یې په بیلابیلو سیمو کې نسکورې شوي دي.
د روسیې د بلګوراد سیمې والي، ویاچیسلف ګلادکوف ویلي، چې د برید په پایله کې دوه ملکي وګړي وژل شوي دي.
د سیمې والي تایید کړې، چې برید د تېلو او د انرژۍ تاسیسات په نښه کړي دي.
هغه وويل: «هوایي دفاعي ځواکونو الوتکه وویشتله، خو د الوتکې د لوېدو په پایله کې د تېلو یو ټانکر اور واخیست.»
ښاغلي ګلادکوف ویلي، چې لا معلومه نه ده چې پېښه کې څوک ژوبل شوي که نه.
