د رویټرز څیړنه: د چین د دودیزو درملو غوښتنه هر کال د میلیونونو خرو د وژلو لامل کیږي

رویټرز د څارویو د ساتنې د ملاتړو ډلو او د وترنری متخصصینو له قوله لیکلي، چې د چین دودیزو درملو غوښتنه په افریقا کې هر کال د ملیونونو خرو د وژلو لامل کیږي.

دغه څېړنیز راپور کې د چین د دولتي رسنیو په حواله لیکل شوي، چې د خره د پوستکي د هر ۵۰۰ ګرامو بیه ۴۲۰ ډالرو ته رسېدلې ده.

رویټرز خبري اژانس په خپل تحقیقاتي راپور کې لیکلي، چې په چین د خرو د پوستکي څخه اخېستل شوي کلاژن چې دودیز درمل ترې جوړیږي او په چین کې ورته تقاضا لا ډیره شوې، په افریقا کې د خرو د لویې وژنې لامل شوې ده.

کلاژن د یو پروټین نوم دی چې د بېلابېلو موجوداتو غمبرو کې شتون لري. کلاژن د مخ او بدن د ښکلا او ځوان ساتلو اړینه سرچینه ده. چین د خره د پوستکي کلاژن څخه یو ډول دودیز درمل جوړوي چې د 'ای جیایو' په نوم یادیږي.

په وروستيو کلونو کې په چين کې د 'ای جیایو' غوښتنه ډېره شوې ده.

د دې دوديز درملو د غوښتنې د زياتوالي لامل د شتمنۍ زیاتوالی، د چین د دودیزو درملو د محبوبیت زیاتیدل او د شرکتونو له خوا د درملو بازارموندنې په شان بېلا بېلو عواملو پورې اړه لري.

له بلې خوا، افريقا چې په نړۍ کې د خرو تر ټولو زيات نفوس لري، د چين د 'ای جیایو' صنعت لپاره عمده سرچينه ګرځېدلې ده.

د خرو د پوستکي تقاضا په ټوله افریقا کې د دې حیوان د وژلو د زیاتوالي لامل شوې ده.

رویټرز په خپل راپور کې لیکلي دي چې د خرو وژل د نجونو او ماشومانو پر ژوند مستقیم اغیز کوي.

د رویټرز موندنې ښیې چې میلیونونه نجونې او ماشومان د درنو بار وړلو لپاره خره کاروي، او د خرو ډله ایزه وژنه په کلیوالو ټولنو کې نجونې او میرمنې دې ته اړ باسي چې اوږد واټن پلي ووهي.

روغتیا پوهانو خبرداری ورکړی، چې په لویه کچه د خرو وژل روغتیا ته خطر پېښوي.

دوی وايي، د خرو وژل او د پوستکي لېږدولو بهیر د ناروغیو په خپرېدو کې مرسته کولای شي.

د څارویو د حقونو ډلو او نړیوالو سازمانونو د خرو او د هغو ټولنو د ساتنې لپاره د بیړني اقدام غوښتنه کړې چې پر دوی تکیه دي.

د افریقایي اتحادیې د فبرورۍ په میاشت کې، په ټوله قاره کې د پوستکي سوداګرۍ لپاره د خرو په وژلو بندیز ولګاوه، خو د دې بندیز پلي کول ستونزمن ښکاري ځکه چې په افریقایي ټولنو کې د پراخې بې وزلۍ له امله د خرو د پوستکي ناقانونه تجارت عام دی.