امریکا د دوه جیټ الوتکو چې په مصنوعي ځیرکتیا او انساني پیلوټ سمبال وې، سیالي ترسره کړه
د متحده ایالاتو د دفاع وزارت ویلي، چې په دې تمریني سیالۍ کې دوو ایف- ۱۶ جیټ الوتکو په ساعت کې تر ۱۲۰۰ کیلومتره سرعت سره الوتنې ترسره کړې او له یو بل سره یې سیالي وکړه. د یوې الوتکې پیلوټ انسان او بلې یې د مصنوعي څیرکتیا پر مټ پرواز کاوه.
د امریکا د دفاع وزارت ویلي، چې دغه سيالۍ يې د تېر کال په سپټمبر مياشت کې ترسره کړې وې.
د متحده ایالاتو د دفاع وزارت د څیړنېزو پروژو اژانس په دې وروستیو کې په یوه اعلامیه کې لیکلي، چې د مصنوعي ځیرکتیا سره د یوې جیټ الوتکې او د انسان پیلوټ ترمنځ هوای سیالي «د فضایي صنعت په تاریخ کې یوه د بدلون شیبه» ده.
دا سیالۍ، چې په کالیفورنیا کې د اډوارډز هوايي ځواک په اډه کې شوې، د مصنوعي ځیرکتیا د پرمختګ او په عصري جګړې کې د دې مصنوعي ځیرکتیا کارول پر لور یو مهم ګام دی.
د متحده ایالاتو دفاعي څیړنیزو پروژو اژانس له لوري خپاره شوي عکسونه، ښیي چې یوه ایف-۱۶ جیټ الوتکه چې په مصنوعي ځیرکتیا سمباله ده له هغې الوتکې سره چې پیلوټ یې انسان دی د تمرین په حال کې دي.
د امریکا د دفاع وزارت له لوري د دغې سیالی په اړه لا ډیر جزییات نه دي خپاره شوي.
