د تهران د اور وژنې اداره: په یوه ساختماني شرکت کې اورلګېدنې شپږ بهرني کارکوونکي مړه کړي دي
د تهران ښاروالۍ د اور وژنې او خوندیتوب خدمتونو ویاند د پنجشنبې په ورځ ویلي، چې په یوه ساختماني شرکت کې د اورلګېدنې له امله شپږ کسان مړه شوي دي. جلال ملکي وايي، چې د دې اورلګېدنې قربانيان بهرني وګړي دي.
د دغو کارکوونکو د هویت په اړه لا معلومات نه دي ورکړل شوی.
د دغه ایراني چارواکي په وینا، اورلګېدنه د پنجشنبې په ماسپښین د تهران په ختیځ کې د شهید یاسیني لویې لارې ته څېرمه په یو ساختماني شرکت کې رامنځ ته شوې ده.
د ایران د دولتي رسنیو د راپور له مخې، د تهران د اور وژنې او خوندیتوب خدماتو ادارې ویاند ویلي، چې په اور لګېدنه کې یو بل کارکوونکی هم ټپي شوی او روغتون ته وړل شوی دی.
جلال ملکي وايي، چې د دغه شرکت په يوه برخه کې د کارګرانو خونې وې او هلته په یوې خونې کې اور لګیدلی چې لامل یې لا معلوم نه دی.
تر اوسه معلومه نه ده چې د دې پېښې قربانیان د کومو هېوادونو اتباع دي، خو د ایران ډېری کډوال افغانان دي.
افغان کارګران په دې هېواد کې په سختو، ناامنو شرایطو کې د اسنادو او کار د اجازې د نه لرلو له امله په کم معاش کار کوي.
