جو بایډن: ایران د اسراییل د له منځه وړولو په لټه کې دی

د امریکا ولسمشر د چهارشنبې په ورځ په وال سټریټ ژورنال کې په یوه مقاله کې لیکلي، چې ایران د اسراییل د حکومت د نسکورولو په لټه کې دی.

هغه خبرداری ورکړ چې "که ایران پر اسراییل بریدونه زیات کړي، امریکا به هم په دې کړکېچ کې ښکېله شي".

بایډن د شنبې په شپه پر اسراییل د ایران برید بې ساری وباله او زیاته یې کړه، چې د حماس او حزب الله په ګډون د خپلو نیابتي ډلو له کلونو ملاتړ وروسته، د ایران حکومت په مستقیمه توګه اسراییل په نښه کړل.

د امریکا د ولسمشر په مقاله کې زیاته شوې، چې د اسراییل دفاعي سیستمونو د ایران د بې پېلوټه الوتکو او توغندیو د بریدونو په شنډولو سره د بې شمېره خلکو ژوند وژغوره.

هغه د نړۍ له نقشې څخه د اسراییل د ړنګولو لپاره د ایران د حکومت هوډ ته اشاره وکړه او ویې ویل؛ که تهران د اسراییل پرضد خپلو بریدونو ته زور ورکړي، د امریکا پښه به هم په دغه جګړې ته راښکته شي.

بایډن لیکلي: «اسراییل په منځني ختیځ کې زموږ قوي متحد دی. دا د تصور وړ نه ده، چې موږ به د دې هېواد د دفاعي توان د کمزوري کېدا په صورت کې د دفاع اقدام ونه کړو."

تر دې مخکې جوبایډن له اسراییل غوښتي وو، چې د ایران وروستیو بریدونو ته ځواب ور نه کړي او دا چې هېواد یې پر ایران د اسراییل په برید کې د ګډون اراده نه لري.

د اسراییل لومړي وزیر د چهارشنبې په ورځ د برېتانیا د بهرنیو چارو وزیر ته وویل، چې اسراییل به د ایران د بریدونو ځواب ورکړي او د خپلو متحدینو په مشوره به په خپلواکه توګه عمل وکړي.

اسرايیلي سرچینو ویلي دي، چې د اسراییل ځواب به شاید محدود وي او موخه یې له ایران سره د جګړې پراخول نه دي.

دا اندېښنه هم شته، چې د اسراییل نوی ځواب به د ایران د ځوابي بریدونو لامل شي.

ایراني چارواکو ګواښ کړی چې د اسراییل د نوي برید پر وړاندې به پرېکنده او پراخ ځواب ورکړي.
د اسراییل ټولو متحدینو له دغه هېواده غوښتي، چې د ځواب له ورکولو دې ډډه وکړي؛ ځکه په دې سره په سیمه کې د تاوتریخوالي کچه لوړیږي او منځنی ختیځ به په یوې بلې جګړې کې ښکېل شي.

د اسراییل او ایران تر منځ کړکیچ وروسته له هغې زیات شو، چې په دمشق کې د ایران کونسلګري د اسراییل له خوا په نښه او د سپاه پاسداران د یو شمېر غړو په ګډون یې د کونسلګرۍ یو شمېر ډېپلوماټان ووژل.

ایران په ځوابي برید کې پر اسراییل د توغندیو او ډرون الوتکو برید وکړ، چې په نړۍوال کچ یې پراخ غبرګون لاره.