د طالبانو بهرنيو چارو وزارت: پر اسراييل د ایران بريد «دفاعي او مشروع اقدام» دی
د طالبانو بهرنيو چارو وزارت په يوې خبرپاڼه کې پر اسراييلو د ایران هوايي بریدونه «دفاعي او مشروع اقدامات» بللي دي. طالبانو په خبرپاڼه کې د نړۍ پر هېوادونو ږغ کړی، چې د «اسراييل د حکومت د جنايتونو درولو» په موخه خپلي هڅې ګړندۍ کړي.
د طالبانو بهرنیو چارو وزارت نن یکشنبه د (وري ۲۶مه) پر اسراییل د ایران بريد ته په اشارې ويلي، چې اسراييل د سېمې د يو شمېر «هېوادونو د حريم د نقضولو او ناامنيو د پراخولو» هڅه کوي.
د ایران او اسراييلو ترمنځ مخامخ کړکېچ هغه مهال زيات او د خبرونو سرټکي جوړ شول، کله چې تېره شپه سپاه پاسدارانو پر اسراييل د لسګونو توغنديو او بې پيلوټه الوتکو د بريدونو خبر ورکړ.
سپاه پاسداران په یوه خبرپاڼه کې لیکلي، چې د اسراییل «جنایتونو» په ځواب کې د سپاه پاسداران هوايي ځواک په لسګونو توغندي او بې پیلوټه الوتکو سره د اسراییل دننه ځینې هدفونه په نښه کړي.
طالبانو بهرنيو چارو وزارت تر دې بريدونه وروسته په خپله خبرپاڼه کې ليکلي: «اسراییل حکومت د خپلو جناياتونو په دوام د اپرېل پر لومړۍ نېټه د ټولو ديپلوماتيکو نورمونو خلاف د سوریې پلازمېنه دمشق کې د ايران سفارت کونسلۍ څانگه په نښه کړه، چې په ځواب کې يې ایران تېره شپه مشروع دفاعي اقدامات ترسره کړل.»
طالبانو په خپله خبرپاڼه کې ويلي، چې د اسراييل له لوري په غزه کې د فلسطينيانو د نسل وژنې هڅه په سېمه کې د ناامنيو د زياتېدو په مانا ده.
د ایران وسله والو ځواکونو لوی درستیز ویلي، چې د اسراییل پر ضد عملیات پای ته رسېدلي او د دغو عملیاتو د دوام اراده نه لري.
محمد باقري وویل: «دغه عملیات یو خبرداری و، خو د ایران په وړاندې د هر ګام غبرګون به ډیر لوی وي.»
پر اسراييل د ایران تر بريد وروسته د اسراییلو لومړي وزير بنیامین نتانیاهو په یوه خبرپاڼه کې ویلي، چې اسراییل به د ایران بریدونو ته ځواب ورکړي.
