د ترکيې د کورنيو چارو وزارت د کوچني اختر په ورځو کې شاوخوا ۱۲۰۰ کډوال نيولي دي
د ترکیې د کورنیو چارو وزیر علي یرلي کایا اعلان کړی، چې د دغه هېواد پولیسو د کوچني اختر په ورځو کې شاوخوا ۱۲۰۰ "ناقانونه" کډوال نیولي دي.
ښاغلي کایا وویل، چې د اپریل له ۶ مې څخه تر ۱۰مې پورې په ټول هېواد کې د «کالکان ۱۹» په نوم عملیاتو کې یو زرو ۱۱۷ کسان نیول شوي دي.
د ترکیې د اناتولې خبري اژانس د دغه هېواد د کورنیو چارو د وزیر په حواله راپور ورکړی چې ټول بندیان به د اداري پړاونو له ترسره کیدو وروسته سمدستي خپل هېواد ته واستول شي.
یرلي کایا د ترکیې خلکو ته په خطاب کې وویل، چې د هېواد امنیتي ځواکونه د "ناقانونه کډوالو" په وړاندې خپلو عملیاتو ته دوام ورکوي.
د نیول شویو کسانو هویت تر اوسه نه دی په ډاګه شوی.
په ترکيه کې د کډوالو ډیری غړي سورياييان، ايرانيان او افغانان دي. ترکیه اروپا ته د ایراني او افغان کډوالو د تګ یوه له مهمو لارو څخه ده.
