د روسیې بهرنیو چارو وزارت خپلو وګړو ته ویلي چې منځني ختیځ ته له تلو ډډه وکړي

د روسیې د بهرنیو چارو وزارت ویاندې د دغه هېواد وګړو ته سپارښتنه وکړه، چې منځني ختیځ په تېره بیا اسراییل، لبنان او فلسطیني سیمو ته له سفر ډډه وکړي. ماریا زاخارووا ویلي، چې په منځنۍ ختیځ کې وضعیت کړکیچن او خراب دی.

په ورته وخت کې د کرملین ویاند دیمیتري پسکوف په دمشق کې د ایران پر کونسلګرۍ وروستي برید ته په اشارې نن خبریالانو ته وویل، روسیه له ټولو ښکېلو غاړو غواړي چې له زغم کار واخلي، ترڅو د وضعیت د بې ثباتۍ مخه ونیول شي.
د ایران د اسلامي جمهوریت مذهبي مشر علي خامنه يي ویلي، چې په دمشق کې د اسلامي جمهوریت پر کونسلګرۍ د برید له امله به اسراییل ته سزا ور کړل شي.
اسراییلي چارواکو هم ویلي دي، چې د ایران د هر ډول برید ځواب ته چمتو دي.
بلومبرګ د چهارشنبې په ورځ راپور ورکړ، چې امریکا او متحدان یې په دې باور دي، چې په اسراییل کې پر پوځي او حکومتي اهدافو د ایران او د دوی د نیابتي ځواکونو توغنديز او د بې پیلوټه الوتکو بریدونه "نږدې" دي.