په سیستان او بلوچستان کې د یوه برید له امله ۷ ایراني پولیسو ته مرګ ژوبله واوښته
د سیستان او بلوچستان په سېب و سوران ښار کې د ایراني پولیسو او د جیش العدل د جنګیالیو تر منځ په نښتو کې پنځه ایراني پولیس ووژل شول او دوه نور یې ټپيان شوي دي.
د تسنیم خبري اژانس د راپور له مخې؛ دا پېښه تر هغې وروسته رامنځته شوه، چې د ایران په سیستان او بلوچستان ایالت کې د پولیسو پر دوو موټرو د جیش العدل ډلې جنګیالیو برید وکړ.
تسنیم همداراز لیکلي: «دغه دوه موټر چې له سېب و سوران څخه مهرستان ته تللي و، د بېرته راګرځېدو پرمهال له برید سره مخامخ شول.»
جیش العدل د یوې خبرپاڼې په خپرولو سره د برید مسوولیت منلی دی.
د سیستان او بلوچستان امنیتي مرستیال علي رضا مرحمتي ایراني رسنیو ته په خبرو کې ویلي، چې پېښه د پولیسو د ګزمې پر مهال رامنځته شوې ده.
نوموړی وایي؛ که څه هم جیش العدل د برید مسوولیت پر غاړه اخیستی خو مونږ دا خبره نه منو او د پېښې د عاملینو لپاره پلټنې روانې دي.
د یادولو ده، چې څو ورځې وړاندې هم د ایران د امنیتي ځواکونو او جیش العدل د جنګالیو ترمنځ نښته وشوه، چې شاوخوا دولس ساعته یې دوام وکړ.
د راپورونو له مخې؛ په دې پېښه کې د جیش العدل ۱۸ غړي او د ایران لس امنیتي ځواکونه ووژل شول.
