د ټایوان زلزله؛ تر دې دمه پکې نهه کسان مړه او ۷۷ لادرکه دي
نن سهار د ریښتر په کچه ۷.۴ درجې زلزلې د ټایوان ختیځې سیمې ولړزولې. دغه زلزله چې په نږدې ۲۵ کلونو کې بېسارې یاده شوې تر دې دمه پکې نهه کسان مړه شوي او ۷۷ نور لادرکه دي. د دغې زلزلې مرکز د ټایوان د هوالین ښار سویلي سیمه ښودل شوې ده.
د لټون او ژغورنې عملیات پیل شوي او په ویجاړو شویو ودانیو کې د ژوندي پاتې شویو کسانو د موندلو لپاره هڅې هم پیل شوې دي.
نړۍوالې ټولنې هم د نړۍ له ګوټ، ګوټ څخه د خواخوږۍ پیغامونو او د مرستې ژمنې سره خپل ملاتړ په ډاګه کړی دی.
د ټایوان د دفاع وزارت په هوالین ښار کې د زلزلې له امله د ویجاړو شویو کورونو انځورونه خپاره کړي دي.
د رسنیو د راپورونو له مخې، په ټایوان کې د میټرو خدمتونه ځنډېدلي دي؛ خو د دغه هېواد په پلازمېنه کې حالت عادي خوا ته روان دی او ماشومان په عادي ډول خپلو ښوونځیو ته روان دي.
د ټایوان د زلزلې د څارنې د ادرې مشر وو چیان فو رسنیو ته ویلي، چې د چین له سواحلو څخه د ټایوان تر کنټرول لاندې جزیرې کینمن ته هم د دغې زلزلې اغېزې رسېدلې دي.
د نوموړي په خبره له لومړۍ زلزلې وروسته په تایپې کې د څو نورو زلزلو ټکانونه هم احساس شوي دي.
دغه زلزله په ټایوان کې د ۱۹۹۹ کال راهیسې تر ټولو ستره او زوروره زلزله بلل شوې ده.
