په اسراییل کې د دولت ضد زرګونو اعتراض کوونکو د بنیامین نتانیاهو د استعفا غوښتنه وکړه

د تل ابیب په ګډون د اسراییل په ډېرو ښارونو کې زرګونو کسانو د شنبې په ورځ د دولت ضد لاریونونو کې برخه واخیسته. د راپورونو له مخې، په تل ابیب کې پولیسو له لاریون کوونکو سره نښته کړې او یو شمېر اعتراض کوونکي نیول شوي هم دي.

اسراییلي رسنۍ وایي؛ لاریون کوونکي د دغه هېواد د لومړي وزیر د کور مخې ته راټول شوي او د بنیامین نتنیاهو د استعفا او همداراز د یرغمل شویو کسانو د خوشې کولو لپاره د هوکړې غوښتنه کوي.
اورشلیم پوسټ ورځپاڼې راپور ورکړی، چې اصلي لاریونونه په تل ابیب کې شوي او اعتراض کوونکي د دولت ضد شعارونو په ورکولو سره له حماس ډلې سره د یرغمل شویو کسانو د خوشې کېدو په موخه د هوکړې غوښتنه کوي.
اسراییلي رسنیو زیاته کړې، چې پولیسو د تل ابیب لویې لارې تړلې دي او پولیسو د لاریون کوونکو د خورولو لپاره پر هغوی اوبه شېندلې دي.
د اورشلیم پوسټ په وینا، پولیسو لږ تر لږه ۱۶ لاریون کوونکي نیولي دي.