د اوکراین ولسمشر وايي، چې د امریکا له مرستې پرته به یې سرتېري شاتګ ته اړ شي

د اوکراین ولسمشر ولادیمیر زلنسکي د جمعې په ورځ وویل، که امریکا له دغه هېواد سره د پوځي مرستو په برخه کې خپله ژمنه عملي نه کړي؛ نو اوکرایني سرتېري به شاتګ ته اړ شي. د امریکا په کانګرس کې مخالفتونه د دې لامل شوي، چې اوکراین سره د ۶۰ ملیارد ډالرو مرسته تصویب نه شي.

د امریکا ډیموکراټ ولسمشر جو بایډن د جمهوري غوښتونکو تر کنټرول لاندې له استازو جرګې غوښتي، چې اوکراین ته د مالي او پوځي مرستو کڅوړه تصویب کړي؛ خو د استازو جرګې مشر مایک جانسون د امریکا د کورني لومړیتوبونو په ذکر کولو سره، له میاشتو راهیسې د دغې کڅوړې له تصویبه ډډه کړې.
زلنسکي واشنګټن پوسټ ته ویلي:« که د امریکا ملاتړ نه وي، دا په دې مانا ده چې موږ هیڅ ډول هوایي دفاع، پاټرویټ توغندي، الکټرونیکي جګړې لپاره پارازیټونه او د توپخانې ۱۵۵ملي مټرۍ ګولۍ نه لرو.»
هغه زیاته کړه، چې د امریکا نه مرسته کول په کوچنیو پړاوونو کې د شاتګ لامل ګرځي.
له دې سره هغه وویل، هېواد یې هڅه کوي چې د شاتګ د مخنیوي لپاره ځینې حل لارې ومومي.