د ترکيې ځایي ټاکنې او له مخالفينو څخه د لويو ښارونو د ادارې په نيولو کې د اردوغان ننګونه
د ترکیې ملیونونه خلک به د یکشنبې په ورځ - وري په۱۲مه - د ښاروالانو او ښاري شوراګانو په ځایي ټاکنو کې پریکړه وکړي چې د لویو ښارونو اداره چا ته وسپاري.
په دې ټاکنو کې رجب طیب اردوغان هڅه کوي چې له خپلو سیالانو څخه د استانبول ښاروالي بیرته ترلاسه کړي.
د بي بي سي د راپور له مخې، پنځه کاله وړاندې د ترکیې د خلکو د جمهوري غوښتونکي ګوند (CHP) څخه د اپوزیسیون د ایتلاف استازي اکرم امام اوغلو د ترکیې د ستر اقتصادي او ټولنیز مرکز، استانبول، اداره ترلاسه کړه.
اردوغان چې په دې ۱۶ میلیوني ستر ښار کې زیږیدلی غواړي د دې ښار واک له خپلو مخالفینو بیرته واخلي.
د استانبول د رایو پایلې د اپوزیسیون لپاره یوه مهمه ازموینه ده، چې ایا دوی په راتلونکو څلورو کلونو او د ولسمشرۍ ټاکنو راتلونکي دورې کې د اردغان او د هغه د اک پارټي یا ګوند لپاره جدي ګواښ رامنځته کولي شي یا نه.
د مدیپول استانبول پوهنتون د اړیکو څخه او د چنار سیاسي څیړنیز مرکز مشر احسان اکتاش وویل، "استانبول د هغه کور دی. د ۲۰۱۹کال ځایي ټاکنو کې د استانبول له لاسه ورکول د اردوغان لپاره لویه ماتې ګڼل کیږي."
استانبول هغه ځای دی چیرې چې اردوغان په ۱۹۷۰ لسیزه کې سیاست ته له ننوتلو دمخه په سړکونو کې د «سیمیت» ډوډۍ پلورلې.
اردوغان په بې اوغلو سیمه کې د اسلامي ګوند د ځوانانو څانګې مشر و او له هغه ځایه یې د استانبول ښاروالی، لومړي وزیري او په پای کې د ترکیې ولسمشرۍ ته لاره پیدا کړه.
واکمن ګوند، د عدالت او پراختیا ګوند او اسلامپالو په ۲۰۱۹کال کې له ماتې مخکې ۲۵کاله د استانبول او انقرې واک په لاس کې درلوده.
د استانبول د هایشیک پوهنتون د سیاسي علوم استاد سدا دمیرال وویل: «که څه هم اپوزیسیون د تېر کال ولسمشریزې ټاکنې وبایلودې، خو لا هم د استانبول او ولسمشریزو ټاکنو د ګټلو قوي امکان شته.»
دمیرال زیاته کړه: "که امام اوغلو په استانبول کې بیا بریا ترلاسه کړي، نو اپوزیسیون به د ۲۰۲۸ ولسمشریزو ټاکنو ته ډېرې هیلې ولري."
دغه ښار چې د ترکیې د ۸۵میلیونو نفوسو یو پر پنځمه برخه نفوس لري او د بېلا بېلو سیاسي، قومي، مذهبي او اقتصادي نظریاتو درلودونکي رایه اچونکي لري.
