د روسیې د بهرنیو چارو وزارت ویانده: دا باور کول ګران دي چې د مسکو برید د داعش کار و
د روسیې د بهرنیو چارو وزارت یوه ویاندې د چهارشنبه په ورځ وویل، چې دا "ډېر ستونزمن" دی چې باور وکړي؛ په مسکو کې د کنسرت په تالار کې وژونکی برید د داعش ډلې پر غاړه درلود.
ماریا زاخارووا پرته له دې چې شواهد وړاندې کړي وویل، چې اوکراین د برید تر شا لاس درلود چې لږ تر لږه ۱۴۰ کسان یې ووژل.
د روسیې د بهرنیو چارو وزارت ویاند په مسکو کې په یوه خبري کنفرانس کې وویل؛ لویدیځ د اوکراین او لویدیځو حکومتونو د تورونو د لېرې کولو لپاره سمدستي د داعش پر اوږو ور اچوي.
زاخارووا زیاته کړه: "د لویدیځ څخه د شک د لرې کولو لپاره دوی په چټکۍ سره فکر کولو ته اړتیا لري؛ له همدې امله دوی داعش ته مخه کړه."
د چهارشنبې په ورځ د روسیې حکومتي پلټونکو اعلان وکړ، چې دوی د برید وروسته د ۱۴۳ ورکو شويو کسانو راپور ترلاسه کړی.
د تایید شویو شمېرو له مخې؛ تر اوسه د پنځو ماشومانو په ګډون ۱۴۰ کسان وژل شوي دي.
داعش خراسان د دغه برید مسوولیت پر غاړه اخیستی، چې په تېرو شلو کلونو کې پر روسیې تر ټولو خونړی برید دی.
امریکايي چارواکو ویلي، چې د دغه هېواد معلومات ښيي چې دغه برید داعش دغه برید کړی دی.
همداراز امریکايي چارواکو ویلي، چې واشنګټن د دې پېښې په اړه د روسیې حکومت ته خبرداری ورکړی و.
د روسیې ولسمشر ولادیمیر پوتین دا برید د اسلامپالو وسله والو کار بللی؛ خو ویلي یې دي چې دا برید د اوکراین په ګټه دی او ښايي کییف هم په کې لاس ولري.
پوتین وویل، چې په اوکراین کې یو چا د برید کوونکو د تېښتې لپاره زمینه برابره کړې وه؛ خو روسي اجنټانو مخکې له دې چې بریدګر هلته ننوځي ونیول.
د بېلاروس ولسمشر الکساندر لوکاشینکو د سې شنبې په ورځ وویل، چې برید کونکو په پیل کې غوښتل چې د هغه هېواد له لارې تېر شي او بیا وروسته پوهېدل چې د بېلاروس پوله تړلې ده اوکراین ته لاړل.
د روسیې د امنیت د ادارې مشر د سې شنبې په ورځ وویل، چې دی په دې باور دی چې د مسکو په برید کې د امریکا متحده ایالات او برېتانیا هم شامل دي.
اوکراین په دې برید کې لاس لرل رد کړي دي.
د برېتانيا د بهرنيو چارو وزير ډيويډ کامرون هم ويلي، چې په بريد کې د لوېديځ او اوکراين د رول په اړه د روسيې ادعا بې بنسټه ده.
