د اوکراین جګړه؛ د روسیې پوځ د ۱۳ بې پیلوټه الوتکو په مرسته پر اوکراین برید وکړ
د اوکراین د هوايي ځواکونو قوماندان میکولا اولشچوک وویل، چې روسیې تېره شپه د اوکراین خاوره په ۱۳بې پیلوټه الوتکو سره په نښه کړې وه.
د هغه په وینا، په کییف، خارکیف او سومي سیمو کې د روسیې لس بې پیلوټه الوتکې، د الوتکو ضد سیسټمونو، ګرځنده اور وژونکو ډلو او د اوکراین د جنګي تجهیزاتو له خوا ودرول او وویشتل شول.
تر دې مخکې د وري په پنځمه نېټه د لوېو ښاروال اندري سادووي اعلان وکړ، چې د اوکراين په لوېديځ کې د دغه ښار پر لور د روسيې له خاورې شاوخوا شل توغندي او اوه بې پيلوټه الوتکې چې د ايران له خوا جوړ شوي وې، ويشتل شوې دي.
له بلې خوا؛ اوکراین هم هڅه کړې چې د کییف پلوه روسي رضاکارانو په کارولو سره جګړه د روسیې خاورې ته واړوي.
د اوکراین د امنیتي خدماتو یوه جګپوړي افسر، واسیل مالوک وویل؛ د دې هېواد جاسوسي اداره "شاید" د کرملین پلوه د اوکراینیانو د وژلو په پټ کمپاین کې لاس لري.
هغه د ۱۴۰۲ کال د وري په میاشت کې د سن پټرزبرګ په یوې قهوه خانه کې د اوکرایني نژاد روس پلوه پوځي بلاګر ولادلن تاتارسکي وژنې ته اشاره وکړه او زیاته یې کړه چې تاتارسکي د یوکراینانو د "ډېر" شمېر یوازینۍ بیلګه وه، چې مسکو سره د همکارۍ له امله وژل شوي.
د کییف لوی څارنوال اندري کوستین وویل، چې د اټکل له مخې تر ۱۰ زرو زیات شمېر اوکرایني ملکي وګړي په روسیه کې په زور نیول شوي دي.
د کوستین په وینا؛ لږ تر لږه ۵ زره او ۶۰۰ کسان تر شکنجې لاندې دي.
د کییف لوی څارنوال زیاته کړه: "موږ یوازې د هغو کسانو په اړه خبرې کوو چې روسیې ته په زوره لیږدول شوي، نه د هغو کسانو په اړه چې دا پرېکړه یې په خپله خوښه کړې ده."
هغه ټینګار وکړ، چې د اوکراین په هغو سیمو کې چې د روسیې له اشغال څخه ازادې شوي دي، د روسیې د ځواکونو ۱۶۴د شکنجې خونې او د جبری توقیف مرکزونه کشف شوی دی.
