د روسیې برید؛ اوکراین روسیه تورنه کړه، چې د مسکو د برید په اړه دروغ وایي
وروسته له هغې چې د روسیې ولسمشر ولادیمیر پوتین د مسکو د برید په اړه په یوه وینا کې د داعش نوم ونه ښود او ویې ویل، چې بریدګر اوکراین ته د تېښتې هڅه کوي، کییف په دې کې لاس لرل رد کړل او روسیه یې د دې برید په اړه په دروغو تورنه کړه.
د وروستیو راپورونو له مخې؛ د مسکو په څنډه کې د کنسرت په تالار کې د جمعې د ورځې په وسله وال برید کې د وژل شویو کسانو شمېر تر ۱۴۳ تنو رسېدلی دی.
روسي چارواکو د برید په تړاو د څلورو مشکوکو کسانو د نیولو اعلان کړی او د روسیې ولسمشر ولادیمیر پوتین ویلي، چې دوی اوکراین ته د تېښتې پر مهال نیول شوي دي.
کییف په دې برید کې هر ډول لاس لرل په کلکه رد کړل.
اسلامي دولت (داعش) ډلې د برید پړه پر غاړه اخیستې؛ خو پوتین د شنبې په ورځ خلکو ته په خپله وینا کې د داعش یادونه ونه کړه.
دا په داسې حال کې ده، چې امریکايي استخباراتي چارواکو د داعش ډلې دا ادعا تایید کړې وه.
د امریکا د ملي امنیت شورا ویاندې ادرین واتسون په یوه بیان کې ویلي: «داعش یوازې د دې برید مسوولیت پر غاړه لري. په دې برید کې د اوکراین لاس نه و.
واتسون وویل، چې متحده ایالاتو د مارچ په پیل کې په مسکو کې د "پلان شوي ترهګریز برید" په اړه له روسیې سره معلومات شریک کړل او په روسیه کې امریکایانو ته یې عامه خبرداری ورکړ.
پوتین وویل، روسي چارواکو د برید په تړاو ټولټال ۱۱ کسان نیولي دي. په دغه برید کې تر ۱۰۰ ډېر کسان ټپیان شوي هم دي.
روسي رسنیو داسې ویډیوګانې خپرې کړې، چې د شکمنو کسانو نیول او پوښتنې ترې څرګندیږي.
روسیې دغه وسله وال د تاجکستان اتباع پېژندلي دي، چې په منځنۍ اسیا کې د پخواني شوروي جمهوریت چې له افغانستان سره ګډه پوله لري.
له یو میلیون پنځه سوه زره څخه زیات تاجکان په روسیه کې ژوند کوي او ډېری یې د روسیې تابعیت لري.
د اسوشیتد پرس په وینا؛ ډېری روسي سخت دریځو د تاجک کډوالو د ځپلو غوښتنه وکړه؛ مګر پوتین په ښکاره توګه دا نظر رد کړ او ویې ویل: "هېڅ ځواک به په دې قادر نه شي، چې زموږ په څو توکمیزه ټولنه کې د نفاق، ترهګرۍ یا وېش زهرجن تخم وکري. "
د جمعې د ورځې په برید کې ۱۴۳ کسان ووژل شول، چې دا په وروستیو کلونو کې په روسیه کې تر ټولو خونړی برید بلل شوی دی.
روسي چارواکو ویلي، چې ښايي د برید له امله د وژل شویو کسانو شمېر نور هم لوړ شي.
پوتین د یکشنبې په ورځ د عامه ماتم ورځ اعلان کړه او ویې ویل چې په ټوله روسیه کې اضافي امنیتي تدابیر نیول شوي دي.
دا برید څو ورځې وروسته له هغه وشو، چې پوتین د روسیې د ولسمشرۍ په ټاکنو کې د بریا اعلان وکړ.
دا ټاکنې د پوتین د مخالفینو له سخت فشار وروسته ترسره شوې.
د روسیې په ټولنیزو رسنیو کې ځینو مبصرینو دا پوښتنه کړې، چې څنګه روسي چارواکي چې د هر ډول اپوزیسیون فعالیت او خپلواکو رسنیو په وړاندې په کلکه مبارزه کوي، د متحده ایالاتو له خبرداریو سره سره د برید په مخنیوي کې پاتې راغلي.
