د اسراییل پوځ په شفا روغتون کې د پوځي عملیاتو د پیل خبر ورکړی

د اسراییل پوځ په غزه کې د شفا په روغتون کې د عملیاتو د پیل خبر ورکړی او وایي، دغه ګام یې د داسې اطلاعاتو پر بنسټ اخیستی چې اړتیا یې ده. ویل کیږي چې اسراییلي ځواکونو ته له مخکې د ملکي وګړو، ډاکټرانو او روغتیایي وسایلو ته د زیان د مخنیوي په اړه خبرداری ورکړل شوی.

د راپورونو له مخې، ویل کیږي چې د حماس لوړ پوړي چارواکي د شفا روغتون په شاوخوا کې موجود دي.
د غزې د روغتیا بنسټ اعلان کړی، چې د فلسطین او اسراییلو ترمنځ د جګړو له پیل څخه تر اوسه پورې ۳۱ زره او ۶۴۵ کسان وژل شوي دي.
حماس څلور ورځې وړاندې هم یو ځل بیا اسراییلی پوځ تورن کړ، چې د غزې ښار ته څېرمه یې پر هغو کسانو برید کړی چې د اوړو وېشلو ته په تمه و.
د اسراییل پوځ دا تورونه رد کړل او ویې ویل چې دا «وسله وال فلسطینیان» و چې په خلکو یې ډزې وکړې.
د حماس تر واک لاندې د غزې د روغتیا وزارت په وینا، په دغو ډزو کې ۲۰ تنه وژل شوي او ۱۵۵ نور ټپیان شوي دي.