مصر پر اسراییل غږ کړی، چې غزې ته د مرستو رسولو لپاره ځمکنۍ لارې پرانیزي

د مصر د بهرنیو چارو وزیر د پنجشنبې په ورځ له اسراییل وغوښتل، چې خپلې ځمکنۍ لارې پرانیزي او غزې ته د لازیاتو مرستو رسولو اجازه ورکړي. هغه همدارنګه ویلي، چې مصر د اسراییل او حماس تر منځ د اوربند او د یرغمل شویو بندیانو د تبادلې لپاره خپلو هڅو ته دوام ورکوي.

بشري مرستې تر دې دمه په ځانګړې توګه د رفح له لارې او د کرم شالوم په شاوخوا کې د اسراییل تر کنټرول لاندې لارو لېږدول شوې دي.
خو ورته مهال د مرستو رسولو چارواکي وايي، چې د مرستو دغه کچه د اړتیا پرتله خورا کمه ده.
د مصر د بهرنیو چارو وزیر سامح شکري قاهرې ته د خپل هسپانوي سیال د سفر پر مهال یوې خبري غونډې ته وویل:« اسراییل د شپږو نورو لارو کنټرول هم په لاس کې لري، کومې چې باید پرانیستل شي.»
هغه زیاته کړه:« موږ د بار وړونکو موټرو د زیاتولو ظرفیت لرو؛ خو باید د دغه کار اجازه راکړل شي.»
مصر چې له غزې سره خپلې پولې ته څېرمه د فلسطینیانو له بې ځایه کېدو وېره لري له دې وړاندې یې ویلي و، چې اسراییل د مرستو مخه نیسي.
که څه هم چې اسراییل غزې ته د مرستو په رسولو کې د خنډ رامنځته کولو خبره ردوي؛ خو حماس بیا وایي، چې اسراییل په خپلو پوځي عملیاتو کې لوږه د وسلې په توګه کاروي.
مصر د قطر تر څنګ هڅه کوي، چې د اسراییل او حماس ترمنځ د اوربند او د فلسطیني بندیانو په بدل کې د اسراییلي یرغمل شویو کسانو په خلاصون کې منځګړیتوب وکړي.
شکري د نورو جزییاتو له ورکولو ډډه وکړه او ویې ویل:« موږ اوربند ته د رسېدو او د یرغمل شویو او د فلسطیني بندیانو د خلاصون لپاره کار کوو.»