یوه امریکايي استخباراتي ډله: په عربي ټاپووزمه کې القاعدې د خپل مشر مړینه تایید کړه

یوې امریکايي استخباراتي ډلې اعلان کړی چې په عربي ټاپووزمه کې د القاعده شبکې د خپل مشر خالد بطرفي مړینه تایید کړې. د دغې ډلې د معلوماتو له مخې عاطف العولقي د هغه د ځای ناستي په توګه معرفي شوی. خالد بطرفي د القاعدې له لومړنیو مشرانو څخه و چې طالبانو ته یې د بري مبارکي ورکړه.

د (اېس ای ټي اې) استخباراتي ډلې لخوا په خپره شوې خبرپاڼه کې د بطرفي د مرګ د لامل په اړه جزيات نه دي ورکړل شوي.

بطرفي د ۲۰۲۰ کال په لومړیو کې وروسته له هغه د القاعدې د مشر په توګه وګمارل شو چې د هغه پخوانی مشر قاسم الریمي د متحده ایالاتو لخوا ووژل شو.

بطرفي د القاعدې له هغو ۱۵۰ بندیانو څخه یو و چې په ۲۰۱۵ کال کې وروسته له هغې خوشې شو چې دغې ډلې د یمن بندري ښار مکلا ونیوله.

په یمن کې د القاعدې څانګه د امریکا متحده ایالات له لوري د القاعده شبکې یوه له خونړیو څانګو څخه ګڼل کیږي چې د اسامه بن لادن له خوا جوړه شوې وه.

بطرفي د القاعدې له لومړنیو مشرانو څخه و چې په افغانستان کې یې واک ته د طالبانو تر رسېدو وروسته هغوی ته د بري مبارکي ورکړه.

هغه په ​​یوه پیغام کې ویلي: «دا یوازې د طالبانو بری نه دی، بلکې د (مسلمه) امت بریا هم ده. موږ د خدای شکر ادا کوو چې طالبانو ته یې دا بری ورکړ او موږ دعا کوو چې خدای دې ستاسو په هڅو کې برکت واچوي.»