اسراییل په رفح کې پر یو استوګنېز برج برید کړی
د سیمې د اوسیدونکو په وینا، اسراییل د شنبې په ورځ د غزې په سویل رفح ښار کې د استوګنې یو ترټولو لوی برج په نښه کړی. اسراییل د غزې په سویل کې په هغه وروستۍ سیمه پوځي فشار ډیر کړی چې تر اوسه یې نه ده اشغال کړې. په دغه سیمه کې شاوخوا یو میلیون فلسطینیانو له جګړې پناه اخیستې ده.
دغه ۱۲ پوړیزه ودانۍ، چې له مصر سره له پولې شاوخوا ۵۰۰ متره لرې موقعیت لري، د اسراییل په برید کې زیانمنه شوې او له امله یې په لسګونو کورنۍ بې کوره شوې.
د سیمې د اوسیدونکو په وینا، په دغه برید کې د مرګ ژوبلې راپور نه دی ورکړل شوی. د اسراییلو پوځ سمدستي د پیښې په اړه له تبصرې ډډه کړې ده.
د دغه برج له ۳۰۰ اوسیدونکو څخه یو یې رویټرز خبري اژانس ته ویلي، چې اسراییل دوی ته شپه مهال ۳۰ دقیقې وخت ورکړی و چې له دغې ودانۍ څخه ووځي.
محمد النبریس وویل: "خلک حیران شول، ځینې له زینو ښکته کیدل، ځینې رالویدل، یوه ګډوډي جوړه شوه. خلکو خپل مالونه او پیسې پرېښودې او ووتل."
محمد النبریس زیاته کړه، چې د رامنځ ته شوې ګډوډی پر مهال په ځینو کې لویدلو کسانو کې د هغه د ملګري میندواره میرمن هم وه.
په رفح ښار یو فلسطېیني چارواکي ویلي، چې دغه برید د اسراییل د یرغل نښه کیدای شي.
په غزه کې د اسراییلو د ویجاړونکو هوايي او ځمکنیو بریدونو نه د پنځو میاشتو په تیریدو سره، د غزې روغتیايي چارواکو وايي، چې نږدې ۳۱۰۰۰ فلسطینیان وژل شوي او تر ۷۲ زره او۵۰۰ډیر نور ټپیان شوي، په داسې حال کې چې زرګونه نور د نړیدلو وړانیو لاندې شوي دي.
