په ملګرو ملتونو کې د چین استازي له طالبانو د یوه ټولګډونه حکومت غوښتنه وکړه

په ملګرو ملتونو کې د چین استازي له طالبانو وغوښتل، چې یو ټولګډونه حکومت جوړ کړي او د ښځو او توکمیزو لږکیو په ګډون دې د ټولو وګړو د اساسي حقونو ساتنه وکړي. ګنګ شوانګ له نړۍوالې ټولنې هم وغوښتل، چې له طالبانو سره د "صابرانه اړیکو" له لارې په بهرنۍ نړۍ کې د دې ډلې باور زیات کړي.

شوانګ چې د چهارشنبې په ورځ یې د امنیت شورا په غونډه کې د افغانستان په اړه خبرې کولې، وویل چې له طالبانو سره د خبرو دوام ته اړتیا ده؛ خو هغه ټینګار وکړ، چې د خبرو اترو او تعامل لپاره د مناسبو شرایطو د رامنځته کولو لپاره باید د دغې ډلې پر وړاندې له وړاندوینو څخه ډډه وشي.

ښاغلي شوانګ په خپلو خبرو کې هڅه وکړه، چې د طالبانو تر واک لاندې افغانستان نسبتاً مثبت انځور وړاندې کړي.

هغه وويل، چې د طالبانو له واک ته رسېدو وروسته د افغانستان داخلي وضعيت په ټوليزه توګه ارام شوى او له هېوادونو يې وغوښتل، چې د طالبانو پر وړاندې رښتينی چلند وکړي.

هغه وویل:"د باور جوړونې د یو مهم ګام په توګه، امنیت شورا باید د بندیزونو په برخه کې پر وخت اصلاحات راولي او د طالبانو د چارواکو لپاره د سفري بندیز معافیت بحال کړي."

د چین استازي د ملګرو ملتونو بندیزونه غیر قانوني وبلل او د دغو بندیزونو د لغوه کولو او په امریکايي بانکونو کې د افغانانو د شتمنیو د خلاصون غوښتنه یې وکړه.

د چین استازي د خپلو خبرو په یوه برخه کې له ترهګرۍ سره د مبارزې په برخه کې د طالبانو د ملاتړ غوښتنه وکړه.

نوموړي د ملګرو ملتونو د عمومي منشي د راپور په حواله ویلي، چې په افغانستان کې مېشتې ترهګرې ډلې لا هم فعالې دي او د افغانستان او سیمې امنیت ته ګواښ پېښوي.

هغه له طالبانو وغوښتل، چې په افغانستان کې د ترهګرو ډلو په ځانګړې توګه د داعش پر وړاندې مبارزه وکړي.