د یمن حوثيان وايي، د برېتانوي بېړیو ډوبولو او په نښه کولو ته به دوام ورکړي
د یمن حوثيانو د یکشنبې په ورځ یو ځل بیا خپله ژمنه اعلان کړه، چې په عدن خلیج کې به د برېتانوي بېړیو په نښه کولو ته دوام ورکړي. دا څرګندونې وروسته له هغې شوي، چې د برېتانیا روبیمار نومې کښتۍ د دوی له برید وروسته ډوبه شوې ده.
د متحده ایالاتو پوځ د شنبې په ورځ تایید کړې، چې د برېتانیا روبیمار بېړۍ د فبرورۍ په ۱۸ مه د یمن د حوثي وسله والو له خوا د کښتۍ ضد بالستیک توغندي له برید وروسته ډوبه شوې ده.
د حوثيانو په حکومت کې د بهرنیو چارو مرستیال وزیر حسین العزي پر اېکس خواله رسنۍ خپور کړی او ویلي یې دي: "یمن به د برېتانوي بېړیو ډوبولو ته دوام ورکړي او هر ډول عواقب یا نور زیانونه به د برېتانیا مسوولیت وي."
ښاغلي العزي ویلي: "برېتانیا یو سرکښ دولت دی چې پر یمن بریدونه کوي او په غزه کې د ملکي وګړو پر وړاندې د روانو جرمونو په ملاتړ سره له امریکا سره ملګرتيا کوي."
حوثي وسله والو د نومبر له میاشتې راهیسې په پرله پسې ډول د نړۍوالو سوداګریزو بېړیو پر وړاندې د بې پیلوټه الوتکو او توغنديو پر مټ بریدونه کړي او ویلي یې دي، چې دوی په غزه کې د اسراییل د پوځي اقداماتو په وړاندې د فلسطینیانو سره د پیوستون په موخه دغه عملیات پیل کړي دي.
په سور سمندرګي کې د حوثیانو بریدونو نړۍوال سمندریز کاروبار اغېزمن کړی دی، شرکتونه یې اړ کړي، چې د سویلي افریقا شاوخوا اوږدې او خورا ګرانې لارې غوره کړي او دا وېره یې رامنځته کړې، چې د اسراییل او حماس جګړه به منځنی ختیځ بې ثباته کړي.
متحده ایالاتو او برېتانیا د پر سوداګریزو بېړیو د حوثیانو د بریدونو په غبرګون کې جنوري میاشتې راهیسې په یمن کې د حوثي یاغیانو په اهدافو بریدونه پیل کړي دي.
