د یمن حکومت: د حوثیانو د برید له امله د روبیمار په نوم باري بیړۍ ډوبه شوې ده
د یمن په نړیواله کچه په رسیمت پیژندل شوي حکومت نن په یوه اعلامیه کې ویلي، روبیمار تجارتي بیړۍ چې تیره میاشت حوثیانو برید پرې کړی و، د سور سمندرګي په جنوب کې ډوبه شوې ده.
که دغه پیښه تایید شي، نو دا به په نومبر میاشت کې د حوثي وسله والو له خوا په سوداګریزو بیړیو د بریدونو له پیل راهیسې لومړۍ ډوبه شوې بیړۍ وي.
د یمن حکومت په اعلامیه کې ویل شوي، چې دغه بیړۍ بېګا ډوبه شوې او د "چاپیریال ناورین" خبرداری یې ورکړی.
د امریکا د پوځ مرکزي قومندانۍ یا سینټکام مخکې ویلي وو چې دغې بیړۍ تر ۴۱ زرو ټنو زیاته سره لیږدوله.
د یمن حوثي وسله والو له نومبر میاشتې راهیسې په غزه کې له فلسطینیانو سره د پیوستون لپاره په سور سمندرګي کې پر سوداګریزو بیړیو بریدونه پیل کړي دي.
نږدې پنځه میاشتې وړاندې پر اسراییل د حماس له برید وروسته، اسراییل پر غزې پراخ ځمکني او هوايي، بریدونه پیل کړي او تر اوسه یې له ۳۰ زرو ډیر کسان وژلي دي.
