د هند په بنګلور ښار کې د یوې “شکمنې چاودنې” له امله اته کسان ټپیان شوي دي
د هند په سویلي کرناټکا ایالت کې چارواکو ویلي، چې د دغه ایالت په مرکز بنګلور ښار کې په یوه قهوه خانه کې د یوې "شکمنې چاودنې" له امله لږ تر لږه اته کسان ټپیان شوي دي.
د چارواكو په وينا، دا پېښه ښايي په لاس جوړ شوي د يوه بم د چاودنې له امله رامنځته شوې وي.
د کرناټکا ایالتي لومړي وزیر سری سدار امیا د جمعې په ورځ خبریالانو ته ویلی، چې یو کس دغه قهوه خانې ته یوه کڅوړه وروړې او هلته یې پریښې وه.
د هغه په وينا، په دغه "شکمنه" کڅوړه کې ایښي چاودیدونکو توکو د دغه کس له وتلو وروسته چاودنه رامنځ ته کړې ده.
د هند د ځايي چارواکو په وینا، دغه چاودنه هغه مهال شوې چې خلک په دغه قهوه خانه کې له خپل ورځني کار وروسته د ارام کولو لپاره راټول شوي وو.
په دې وروستیو کې داسې راپورونه خپاره شوي، چې ګواکې ځینې پاکستاني اورپکي د کشمیر له لارې هند ته ورځي تر څو چې هلته ورانکاري بریدونه ترسره کړي.
