د هنګري پارلمان په ناټو کې د سوېډن د غړیتوب وړاندیز تصویب کړ
د هنګري پارلمان د یوې لایحې په تصویبولو سره سوېډن ته لاره هواره کړه، چې د شمالي اتلانتیک د تړون په سازمان "ناټو" کې شامل شي.
هنګري د ناټو وروستی غړی هېواد دی چې په دغه پوځي اتحاد کې د شاملېدو لپاره یې د سوېډن غوښتنه منلې ده.
د هنګري د پارلمان له خوا په ناټو کې د سوېډن د شاملېدو د وړاندېز تصويب د ستاکهولم لپاره د ناټو د غړیتوب وروستی خنډ لرې کړ.
سوېډن دا غوښتنه کابو دوه کاله مخکې پر اوکراین د روسیې له پوځي برید وروسته کړې وه.
د دوشنبې په ورځ د هنګري د پارلمان مطبوعاتي دفتر په ناټو کې د سوېډن د غړیتوب د تصویبیدو خبر خپور کړ.
له ناټو سره د سوېډن له یوځای کېدو سره به د دغه پوځي سازمان د غړو شمېر ۳۲ هېوادونو ته ورسېږي.
