په قطر کې د حماس د یرغمل شویو بندیانو د خلاصون او په غزه کې د اوربند لپاره بیا خبرې پیلوي
رویټرز خبري اژانس د مصر د امنیتي سرچینو په حواله د یکشنبې په ورځ راپور ورکړ، چې په قطر کې به د یرغمل شویو بندیانو د خلاصون او په غزه کې د اوربند لپاره خبرې په راتلونکو ورځو کې بیا پیل شي. د دغه رپوټ له مخې د قطر د خبرو اترو هدف به په غزه کې د اوربند د موافقې بشپړول وي.
سرچینې وايي، د حماس او اسراییل استازي به وروسته د نورو خبرو لپاره قاهرې ته لاړ شي، ترڅو د یرغمل کسانو د خوشي کولو په ګډون د یوې موافقې د پلي کولو د وخت او میکانیزم په اړه تفاهم ته ورسیږي.
تر دې مخکې د اسراییل جنګي کابینې قطر ته د اسراییلي پلاوي د استولو موافقه کړې وه.
د پاریس له دوهم پړاو خبرو وروسته په غزه کې د شپږو اوونیو اوربند په اړه د یوې موافقې د احتمال راپورونه خپاره شوي دي.
