حوثي ډله وايي، امریکا او بریټانیا د یمن پر دریو ولایتونو ۲۲ هوايي بریدونه کړي
په یمن کې میشتې حوثي ډلې د یکشنبې په ورځ ویلي، چې متحده ایالاتو او بریټانیا د پلازمینې صنعا په ګډون د یمن په دریو والیتونو ۲۲ هوایی بریدونه ترسره کړي دي.
د حوثي ډلې پورې تړلي صبا خبري اژانس راپور ورکړی، چې د امریکا او بریټانیې د پلازمینې صنعا په اړوندو سیمو کې ۱۷ هوايي بریدونه کړي دي.
په همدې حال کې د امريکا او بریټانيا هوايي ځواکونو د حيفان ولسوالۍ په قرده سيمه کې پر مخابراتي شبکو دوه هوايي بريدونه کړي او د تعز ولايت د مقبنه ولسوالۍ په شامير سيمه کې يې هم مخابراتي شبکې په نښه کړي دي.
د جمهور خبري آژانس د خبر له مخې د حجه ولایت د ابس ولسوالۍ په الحر فارمونو هم دوه بریدونه شوي دي.
تر دې مخکې د حوثي یاغیانو اړوند المسیره ټلویزیون ویلي وو، چې امریکا او بریټانیا د شنبې په ورځ د یمن په پلازمېنه صنعا کې هوايي بریدونه کړي دي.
المسیره همداشان د حوثي ډلې د یوې پوځي سرچینې په حواله ویلي، چې د امریکا او بریټانیا تازه هوايي بریدونه، به د یمن له خوا د غزې په تړانګه کې د فلسطیني ولس د ملاتړ مخنیوی ونکړي.
امریکا او بریټانیا لا په دې اړه څه نه دي ویلي.
د یمن حوثي ډلې د غزې له تړانګې سره د پیوستون په موخه، چې په اووم د اکټوبر پر اسراییل د حماس له برید وروسته د اسرايیل تر سختو هوايي او ځمکنیو بریدونو لاندې راغلې، په سور سمندرګي او د عدن په خلیج کې هغه باروړونکې بیړۍ په نښه کوي چې له اسراییل یا د هغوی له ملاتړو هیوادونو سره تړاو لري.
