د برتانیا د پارلمان غړی: لندن او ښاروال یې د اسلامپالو په کنټرول کې دي
د برتانیا د پارلمان یوه محافظه کار غړي د لندن پر ښاروال صادق خان نیوکه کړې او ویلي یې دي چې دغه ښار او ښاغلی خان "د اسلامپالو تر کنټرول لاندې دي." لي انډرسن د لندن د لومړني مسلمان ښاروال صادق خان په اړه وويل: "هغه زموږ سرمايه خپلو ملګرو ته ورکړه."
له جي بي نيوز سره په مرکه کې هغه وويل، باور نه لري چې "اسلامپال" د برتانيا په کنټرول کې دي، بلکې باوري دی چې "لندن او صادق خان" د دوی په لاس کې دي.
لي انډرسن د تېرې مياشتې تر نيمايي پورې د برتانيا د محافظه کار ګوند مرستيال و.
د ښاغلي لي انډرسن پر څرګندونو کارګر ګوند، لیبرال ګوند او ځینو برتانوي چارواکو نیوکې کړې دي.
د کارګر ګوند مشرې انیلیز دادز وویل، چې د لی انډرسن څرګندونې په ښکاره "توکمپالنه او اسلام ضد" دي.
ښاغلي دادز د برتانیا پر لومړي وزیر ریشي سونک غږ کړی، چې د لي انډرسن د محافظه کار ګوند اعتبار لغوه کړي.
د هغه په وینا، که ښاغلی سونک په دې برخه کې "کمزوري" وکړي، "خلک به د عصري محافظه کار ګوند په اړه خپل نظر ولري."
د برتانیا د اقتصاد وزیر دا هم وویل، چې د ښاغلي انډرسن څرګندونې په ورته وخت کې "د افسوس وړ" او "تقسیموونکې" دي چې په دې هیواد کې د اسلامیت او یهودیت ضد وروستيیزیاتوالی او دا ډول "تباهۍ فضا" ده.
په همدې حال کې، ګارډین ورځپاڼې د محافظه کار ګوند د یوې سرچینې په حواله ویلي، چې لي انډرسن یوازې غوښتل دا ووایي، چې صادق خان، د لندن د ښاروال په توګه، د "وېروونکو" اسلامپالو لاریونونو په کنټرول کې "په شرمناک ډول" پاتې راغلی.
تر دې مخکې یوه انسټیټیوټ یو راپور خپور کړی و او اعلان یې کړی و، چې د اسراییل او حماس ترمنځ د جګړې له پیل راهیسې په څلورو میاشتو کې په برتانیا کې د مسلمانانو پر ضد کرکه درې برابره شوې ده.
د "تل ماما" انسټیټیوټ د راپور له مخې، د اکتوبر له اوومې تر فبرورۍ پورې په برتانیا کې د اسلام ضد ۲۱۰۰ پېښې ثبت شوې، په داسې حال کې چې دا شمېره د تېر کال په همدې موده کې ۶۰۰ ته رسېدلې وه.
