امریکا د اوکراین د جګړې او د ناوالني د مړینې له امله پر روسیې سلګونه بندیزونه لګولي
متحده ایالاتو د جمعې په ورځ پر اوکراین د روسیې د یرغل د دویمې کلیزې او د روسیې د اپوزیسیون د مشر الیکسي ناوالني د وژل کیدو له امله پر روسیې د پراخو بندیزونه لګولو سره د دغه هیواد ۵۰۰ وګړي او ادارې په نښه کړي دي.
د امریکا ولسمشر جو بایډن ویلي، چې د دغه اقداماتو موخه دا ده چې د روسیې ولسمشر ولادیمیر پوتین "په بهر کې د تیري او په کور دننه د جبر له امه خورا سخته بیه پرې کړي."
بندیزونو د روسیې د میر په نوم د پیسو د ورکړې سیسټم، مالي موسسې، پوځي صنعت، د بندیزونو څخه سرغړونې، د انرژۍ راتلونکي تولیدات او ځینې نورې ساحې په نښه کړي دي. په دغه بندیزونو کې د زندان چارواکي هم په نښه شوي چې د متحده ایالاتو په وینا د ناوالني له مړینې سره تړاو لري.
په واشنګټن کې د روسیې سفارت سمدستي د بندیزونو په اړه له تبصرې ډډه کړې ده.
د بایډن اداره هڅه کوي چې د اوکراین ملاتړ ته دوام ورکړي ځکه چې دا هیواد د مهماتو له شدید کمښت سره مخامخ دی او د امریکا مرستې د کانګرس سره د لانجې له امله د میاشتو لپاره ځنډول شوی دي.
اروپايي ټولنې او بریټانیا هم د جمعې په ورځ د روسیې پر ضد ځینې بندیزونه لګولي دي.
سره له دې هم، پر صادراتو د روسیې متکي ۲.۲ ترلیون ډالري اقتصاد د دوو کلونو د بې ساري بندیزونو په وړاندې د مسکو او لویدیځ د اټکل خلاف، خورا ځواکمن څرګند شوی دی.
روسیې د ۲۰۲۲ کال د فبرورۍ پر ۲۴مه پر خپل ګاونډي هیواد اوکراین برید وکړ او په دغه دوه کلنه جګړه یې تر اوسه لسګونه زره کسان وژلي او ډیر شمیر ښارونه یې ویجاړ کړي دي.
