په سره سمندرګي او باب المندب تنګي کې د حوثي اورپکو بریدونو سوداګریزې بېړۍ ټکنۍ کړي

حوثي اورپکو د سره سمندرګي، عرب او همدارنګه په عدن خلیج کې د اسراییل، امریکا او برېتانیا د بېړیو پر تګ او راتګ بندیز ولګاوه.

د یمن د حوثي اورپکو تر کنټرول لاندې یوې ادارې اعلان وکړ، چې د سره سمندرګي، د عدن خلیج او له عرب سیند څخه د اسراییلي وګړو یا ادارو پورې د اړونده بېړیو تېرېدل منع دي.
د حوثیانو تر واک لاندې د بشردوستانه عملیاتو د همغږۍ مرکز د بېړیو د بیمې شرکتونو ته په یوې لېږل شوې بیانیه کې ویلي، چې په دې بندیز کې هغه بېړۍ هم شاملې دي، چې امریکایي او برېتانوي وګړو یا ادارو پورې اړوند یا تر بېرغ لاندې وي.
یادې ډلې په دې وروستیو کې په سره سمندرګي او باب المندب تنګي کې سوداګریزې چارې ګډوډې کړي دي.
د حوثي اورپکو له خوا دغه بندیزونه په داسې حال کې لګیږي، چې د برېتانیا سمندري سوداګریز سازمان د پنجشنبې په ورځ د عدن په سویل ختیځ کې پر یوې بېړۍ د حوثي اورپکو د توغندیزو بریدونو خبر ورکړ.
ددغه راپور له مخې؛ په یادې بېړۍ دوه توغندي توغول شوي چې له امله یې په بېړۍ کې اور لګېدنه شوې ده.