برېتانیا د پوځي بې پیلوټو الوتکو په برخه کې نږدې شپږ میلیارده ډالر لګوي
د برېتانیا حکومت د پنجشنبې په ورځ ویلي، چې په راتلونکې لسیزه کې خپلو وسله والو ځواکونو ته د بې پیلوټه الوتکو د چمتو کولو لپاره ۴.۵ میلیارده پاونډ (۵.۷ ملیارده ډالره) لګوي. د برېتانیا حکومت دغه پرېکړه وروسته له هغه کړې، چې د اوکراین جګړې د بې پیلوټه الوتکو ارزښت وښوده.
د اوکراین سره د روسیې له جګړې د دوه کلونو په تېرېدو سره داسې ښکاري، چې د بې پېلوټه الوتکو جګړه د روان جنګ یوه مهمه برخه ده او دواړې خواوې هڅه کوي، چې د ټېکنالوژۍ له پلوه برلاسي وي.
د بې پیلوټه الوتکو جوړول ارزانه دي او کولی شي د دښمن تحرکات وڅاري او په دقیقه توګه موخې په نښه کړي.
د برېتانیا د دفاع وزارت ویلي، چې دغه نوې پانګونه به د برېتانیا ځمکنیو، سمندري او هوايي ځواکونو ته د بې پیلوټه الوتکو سپارل ګړندي کړي او دغه الوتکې به د استخباراتو، کشف، څارنې، بریدونو او لوژستیک په برخو کې کارول شوي.
د دفاع وزارت د تدارکاتو مسوول جیمز کارټلیج په یوه اعلامیه کې ویلي: "د اوکراین جګړې د نوو کاریدونکو جنګو وسلو ارزښت وښوده، مونږ هم باید د دغې جګړې سخت درسونه زده کړو او پلي یې کړو. "
