امریکا په غزه کې د موقتي اوربند په ملاتړ ملګرو ملتونو ته د یو پرېکړه لیک وړاندیز کړی
د رویټرز له خوا د دوشنبې په ورځ د لیدل شویو اسنادو له مخې؛ متحده ایالاتو د ملګرو ملتونو امنیت شورا ته په غزه کې د اوربند لپاره د یوې بدیلې مسودې وړاندیز کړې، چې "په غزه کې د لنډمهاله اوربند ملاتړ په ممکنه وضعیت کې کوي".
ډېپلوماټانو د یکشنبې ورځ رویټرز خبري اژانس ته ویلي و، چې د ملګرو ملتونو د امنیت شورا ښايي د سې شنبې په ورځ د الجزایر په ابتکار د دغې شورا د ۱۵ غړو له خوا د اسراییل او حماس په جګړه کې د سمدستي بشري اوربند غوښتنه وکړي، امریکا داسې نښې نښانې ښودلي چې دغه غوښتنه به ویټو کړي.
واشنګټن د اسراییل او حماس جګړې په اړه د ملګرو ملتونو په هر اقدام کې د اوربند له کلمې سره مخالف کړی؛ خو اوس د متحده ایالاتو د مسودې متن هغه الفاظ تکراروي چې ولسمشر جوبایډن ویلي، چې تېره اونۍ یې د اسراییل له لومړي وزیر بنیامین نتنیاهو سره په خبرو کې کارولي وو.
د متحده ایالاتو د مسودې په متن کې راغلي: "په اوسنیو شرایطو کې په رفح ښار کې د لویو ځمکني عملیاتو ترسره کول به ملکي خلکو ته د لا ډېر زیان ورسوي او د ګاونډیو هېوادونو په ګډون د دوی د بیاځلي بې ځایه کېدو لامل شي."
اسراییل پلان لري چې د غزې په سویل کې په رفح ښار برید وکړي ، چیرې چې له ۱ ملیون څخه ډیر فلسطینیانو ره روانو جګړو پناه اخیستې. دا کار د نړیوالو د اندیښنو لامل شوی او وايي، چې دغه برید به په غزه کې روان بشري ناورین لاپسې ژور کړي.
د متحده ایالاتو د پریکړه لیک په مسوده کې راغلي چې دا ډول اقدام به "د سیمه ایزې سولې او امنیت لپاره جدي پایلې ولري، او له همدې امله ټینګار کوي چې دا ډول لوی ځمکني عملیات باید په اوسنیو شرایطو کې ترسره نشي."
دا لا روشانه نده چې د امریکا د پریکړه لیک مسوده به د امنیت شورا د ۱۵ غړو رایګیری ته وړاندې شي او که وړاندې کیږي نو لا یې نیټه نه ده معلومه.
دا په داسې حال کې ده چې الجزایر د شنبې په ورځ امنیت شورا د رای ورکولو لپاره یوه مسوده وړاندې کړې وه، چې د اسراییل او حماس په جګړه کې د سمدستي بشري اوربند غوښتنه کوي. په ملګرو ملتونو کې د متحده ایالاتو سفیرې لینډا توماسګرینفیلډ په چټکۍ سره د دوی له خوا د دغې مسودې ویټو کولو ته اشاره کړې وه.
واشنګټن په دودیز ډول خپل متحد اسراییل د ملګرو ملتونو له اقداماتو ساتي او د اکتوبر له ۷مې راهیسې یې دوه ځله په امنیت شورا کې په غزه کې د اوربند مسوده ویټو کړې ده؛ خو دوه ځلې یې هم ممتنع رایه ورکړې او دغه شورا ته یې اجازه ورکړې چې داسې مسودې تصویب کړي، چې موخه یې غزې ته د بشري مرستو ډېرول او د د جګړې پر مهال د بشري وقفو اوږدول دي.
په همدې حال کې د امریکا، مصر، اسراییل او قطر ترمنځ د جګړې د درولو او د حماس له خوا د برمته شویو کسانو د خوشې کولو خبرې روانې دي.
الجزایر دوه اونۍ وړاندې د اوربند په اړه د پرېکړه لیک لومړنۍ مسوده وړاندې کړې ده؛ خو په ملګرو ملتونو کې د متحده ایالاتو سفیرې لینډا توماس ګرین فیلډ په چټکۍ سره ویلي، چې دغه مسوده کولی شي چې "حساس مذاکرات" له خطر سره مخامخ کړي، چې موخه یې په روانه جګړه کې یوه وقفه ده.
د غزې جګړه تېر کال د اکټوبر په ۷مه هغه مهال پیل شوه؛ کله چې د حماس وسله والو چې د غزې چارې په لاس کې لري، پر اسراییل برید وکړ او د اسراییل د شمېرو له مخې ۱۲۰۰ کسان ووږل او ۲۵۳ نور یې یرغمل کړل.
د دغه برید د غچ اخیستلو په موخه اسراییل د غزې په تړانګه کې پراخ پوځي عملیات پیل کړل چې د غزې د روغتیايي چارواکو په وینا؛ تر اوسیه یې تر ۲۸ زرو ډېر فلسطینیان وژلي او د زرګونو نورو جسدونه د نړېدلو ودانیو لاندې پاتې دي.
