شهرزاد اکبر: طالبان د مدني ټولنې له پنځو غړو سره د مخامخ کېدو جرائت نه لري
د افغانستان د بشري حقونو د خپلواک کمېسیون پخوانۍ مشره وایي، چې د دوحې په ناسته کې د افغانستان د مدني ټولنې د استازو شتون په دې معنا دی، چې نړۍ طالبان په رسمیت نه پېژني. د نوموړې په خبره؛ طالبان په کور دننه او بهر کې خلکو ته د ځواب ویلو لپاره حاضر نه دي.
د دوحې روانې ناستې ته چې د طالبانو استازي هم بلل شوي وو، دغې ډلې د ملګرو ملتونو له خوا د خپلو شرطونو د منل کېدو له امله له برخې اخېستو ډډه وکړه.
یادې غونډې ته د طالبانو بلل کېدل او بیا په دې ناسته کې د دوی نه ګډون له پراخو غبرګونو سره مخ شوی دی.
د دغو غبرګونونو په دوام د دوحې ناستې په درشل کې لسګونو سازمانونو او ښځينه فعالانو د افغانستان لپاره د هېوادونو ځانګړو استازو ته د لیکونو په استولو سره ویلي، چې د ښځو حقونو ته دې د دوحې په ناسته کې لومړیتوب ورکړل شي.
د بشري حقونو دغو فعالانو همداراز په افغانستان کې د جنسیتي توپیر د رسمیت پېژندنې غوښتنه هم کړې ده.
اخوا د بشري حقونو یو شمېر فعالان او د دوحې ناستې ځيني ګډون کوونکي وايي، چې دا ناسته د طالبانو لپاره ښه فرصت و؛ خو دوی دغه فرصت له لاسه ورکړ.
د یادولو ده، چې د دوحې ناسته د شاوخوا ۲۵ هېوادونو د استازو په ګډون د بندو دروازو تر شا روانه ده.
