د اوکراین او روسیې جګړه؛ روسیې له اوکراین څخه د اودیوکا ښار نیولي دی
روسیې د یکشنبې په ورځ ویلي، چې د اوکرایني ځواکونو له وتلو وروسته یې د دغه هېواد د اودیوکا ښار تر بشپړ کنټرول لاندې راوستی؛ خو لا هم ځینې اوکراینې سرتېري له یوې خورا سختې جګړې وروسته د شوروي وخت د کوک په یوه لویه فابریکه کې بند پاتې دي.
د اودیوکا ښار سقوط د ۲۰۲۳ کال په می میاشتې د بخموت ښار له نیولو راهیسې د اوکراین سره په دوه کلنه جګړه د روسیې لپاره تر ټولو لویه لاسته راوړنه ده.
د روسیې د دفاع وزارت ویلي، چې د دوی ځواکونو د ۱۰۰۰ کیلومتره لومړۍ کرښې په دې برخه کې ۸.۶ کیلومتره پرمختګ کړی او دا چې روسي سرتېري په اودیوکا ښار کې تر یوې ویجاړونکې جګړې وروسته مخ په وړاندې روان دي.
د دغه جګړې په پایله د اودیوکا ښار نږدې په بشپړ ډول ویجاړ شوی او خلک ترې وتلي دي.
اوکراین ویلي، چې له څو میاشتو سختو جګړو وروسته یې خپل پوځیان د بشپړې کلابندۍ څخه د ژغورنې په موخه له دغه ښاره ویستلي دي.
پوتین بیا د اودیوکا سقوط یوه مهمه بریا بللې او د روسیې سرتېرو ته یې مبارکي ویلې.
د اوکراین د پوځ مشر د شنبې په ورځ اعلان کړی و، چې ځواکونه یې د دغه هېواد له ختیځ ښار اودیوکا څخه وتلي دي.
اوکرایني پوځ داسې مهال له دغه ښاره وتلي، چې کیف د وسلو او مهماتو له سخت کمښت سره مخامخ دی.
