اسراییل په غزې کې تر ټولو لوی فعال روغتون محاصره کړی
په داسې حال کې چې پر رفح ښار د اسراییل د جنګي الوتکو بمبارۍ دوام لري، د غزې تر ټولو لوی فعال روغتون د جمعې په ورځ هم د اسراییل او حماس د جګړې په لړ کې د اسراییل تر محاصرې لاندې دی، ناروغان او ډاکټران د بې وسۍ په حالت کې دي.
اسراییلي ځواکونو د پنجشنبې په ورځ منلې وه چې دوی پر یو طبي مرکز برید کړی او په ټولنیزو رسنیو کې خپاره شوي تصویرونه ښيي چې د روغتون په دهلیزونو کې چیغې او د ډزو غږونه اوریدل کیږي. دغه وضعیت د سلګونو ناروغانو، طبي کارمندانو او ډېری بې ځایه شويو فلسطینیانو برخلیک په اړه اندیښنې راپورته کړي چې د جګړې له امله یې رفح ښار ته پناه وړې ده.
د اسراییل پوځ، پر ناصر روغتون برید « دقیق او محدود» بللی او ویلي یې دي چې د هغه معلوماتو پر بنسټ یې په روغتون برید کړی چې هلته یې د حماس وسله والو شتون، د یرغملو ساتل او د یرغملو د جسدونو شتون ښکاره کولو.
د غزې د روغتیا وزارت د جمعې په ورځ ویلي، چې په روغتون کې پنځه ناروغان د برېښنا او اکسیجن د بندیدو له امله مړه شوي دي.
د روغتیا نړۍوال سازمان د جمعې په ورځ ویلي، چې د اسراییل له برید وروسته د ناصر روغتون سره د اړیکې ټینګولو هڅه کوي.
د روغتیا نړۍوال سازمان ویاند طارق جاسرویچ وویل: "لا هم جدي ټپیان او ناروغان په دغه روغتون کې شته."
هغه زیاته کړه: "د ژوند ژغورنې خدماتو د دوام لپاره روغتون ته د تېلو رسولو ته بیړنۍ اړتیا ده ... موږ هڅه کوو چې هلته لاسرسی پیدا کړو ځکه چې هغه خلک چې لاهم د ناصر روغتون کې دي مرستې ته اړتیا لري."
اسراییلي پوځ ویلي، چې عسکرو یې تر ۲۰ ډېر فلسطینیان نیولي، چې ویل کیږي د اکټوبر د اوومې په برید کې لاس لري او لسګونه نور یې د پوښتنو ګروېږنو لپاره ځان سره بولي دي.
اسراییلي پوځ ادعا کړې چې عسکرو په روغتون کې مهمات او وسلې هم موندلي دي.
