د حوثي یاغیانو مشر: له فلسطینیانو سره د پیوستون لپاره به خپلو بریدونو ته دوام ورکوو

په یمن کې د ایران له ملاتړه برخمنې حوثي ډلې مشر د پنجشنبې په ورځ ویلي، چې دوی به د فلسطین سره د پیوستون په موخه په سور سمندرګي کې پر بېړیو بریدونو ته تر هغه دوام ورکړي، چې اسراییل پر فسلطینیانو کېدونکو "جرایمو" ته دوام ورکړي.

عبدالمالک الحوثي په یوه ټلویزیوني وینا کې وویل: "زموږ عملیات په دښمن باندې لوی تاثیر لري، چې دا یو لوی بریالیتوب او ریښتینې بریا ده."

هغه وايي، چې دا ډله به په یمن کې د حوثیانو په هدفونو د امریکا او برېتانیا د بریدونو سربېره د فلسطین څخه خپل ملاتړ ته دوام ورکړي.

امریکا او برېتانیا په سور سمندرګي کې پر نړۍوالو بېړیو د حوثیانو د بریدونو په غبرګون کې په یمن کې د دغې ډلې پر مرکزونو هوايي بریدونه کړي وو.

سور سمندرګي کې د حوثیانو بریدونو نړۍواله سوداګري اغېزمنه کړې او شرکتونه یې اړ کړي، چې د سویلي افریقا شاوخوا اوږده او خورا ګران سفرونه ترسره کړي.

دغې موضوع دا ویره هم رامنځته کړې، چې د اسراییل او حماس جګړه به منځني ختیځ هم بې ثباته کړي.

په ورته وخت کې د پنجشنبې په ورځ د حوثې ډلې ویاند په یوې ټلویزیونې وینا کې ویلي، چې حوثي جنګیالیو د عدن په خلیج کې د بریټانیا په "LYCAVITOS" بېړۍ د توغندي برید کړی دی.