محمود عباس: موږ چمتو یو چې د غزې تړانګې مسوولیت پر غاړه واخلو
د فلسطیني ادارې مشر محمود عباس ویلي دي، چې د غزې د تړانګې د بریدونو د احتمالي بندیدو څخه وروسته د دوی اداره چمتو ده، چې د غزې مسوولیت هم پر غاړه واخلي.
هغه له الشرق الاوسط ورځپاڼې سره په مرکه کې زیاته کړې: "مونږ د غزې د تړانګې مسوول وو، یو او پاتې به شو."
نوموړی دا خبرې په داسې مهال کوي، چې له دې وړاندې د حماس مشر اسماعیل هنیه ویلي وو، چې هېڅوک نه شي کولی، د غزې مسوولیت پر خپل سر واخلي.
همدا راز د برېتانیا د بهرنیو چارو وزیر ډېوېډ کامرون دوه ورځې وړاندې اعلان وکړ، چې د حماس مشران باید له غزې تړانګې څخه ووځي او په سیمه کې باید له فلسطیني ادارې سره تړلی نوی حکومت جوړ شي.
هغه په سیمه کې د شخړو د پای ته رسولو او د اسرايیلي یرغمل شویو بندیانو پر خوشې کولو ټینګار وکړ او ویې ویل؛ که د حماس مشران په غزه کې پاتې شي، د اوربند ټینګېدل به ناشونې وي.
کامرون زیاته کړه، چې برېټانیا د فلسطین او اسراییل د شخړې د حل لپاره د "دوو دولتونو، دوو ملتونو" د پلان ملاتړ کوي.
