برېتانيا: اسراييل بايد پر رفح بريد ودروي، د دې ښار اوسېدونکي د تګ لپاره هېڅ ځای نه لري
د برېتانیا د بهرنیو چارو وزیر ډیویډ کامرون وویل، اسراییل باید په رفح کې د هر ډول عملیاتو د ترسره کولو مخکې د پایلو په اړه جدي فکر وکړي. نوموړي په دغه ښار کې د روان وضعیت په اړه خپله اندېښنه څرګنده کړه او اوربند ته د رسېدو لپاره یې د جګړو د بندېدو غوښتنه وکړه.
ښاغلي کامرون په رفح کې د پوځي عملیاتو ترسره کول په دې سیمه کې د زیات شمېر فلسطینیانو د شتون له امله ناشوني وګڼل او زیاته یې کړه چې د رفح اوسېدونکي د تګ لپاره هېڅ ځای نه لري.
سره له دې چې د نړۍوالې ټولنې له خوا له اسراییل څخه د غزې د تړانګې په جنوبي ښار رفح کې چې ولسي خلک په کې راټول شوي دي، د بريد د درولو غوښتنه کوي، دغه هېواد د حماس د له منځه وړلو لپاره پر سيمه د پوځي بريد ټينګار کوي.
د اسراییل د حکومت ویاند ایلون لوی په رفح باندې د دغه هېواد احتمالي حملې ته په اشارې سره د ملګرو ملتونو له مرستندویه موسسو وغوښتل چې د غزې له جنګي سیمو څخه د ملکي خلکو په اېستلو کې همکاري وکړي.
هغه وویل: "داسې مه وایئ چې دا نه شي ترسره کېدی، زموږ سره د یوې لارې موندلو لپاره کار وکړئ."
په ورته وخت کې د ترکیې د بهرنیو چارو وزارت په یوه بیان کې د غزې د تړانګې په جنوب کې د رفح پر ښار د اسراییل د بریدونو په اړه سخته اندېښنه څرګنده کړې ده.
انقرې له نړۍوالې ټولنې په ځانګړې توګه د ملګرو ملتونو له امنیت شورا غوښتي، چې د اسراییل د مخنیوي لپاره لازم اقدامات وکړي.
په دغه بیانیه کې ترکیه په رفح کې د اسراییل پوځي عملیات «د غزې د خلکو د شړلو د پلان یوه برخه» ګڼي.
