د طالبانو رسنۍ: ایران دې یا حزب الله ته امر وکړي او یا دې خپله له اسراییلو سره وجنګیږي
د طالبانو رسنۍ المرصاد له افغانستان څخه غزې ته د ځانمرګو بریدګرو د تللو په اړه په کابل کې د ایران د ځانګړي استازي د څرګندونو ته په غبرګون کې ویلي، چې ولې ایران حزب الله ته د جګړې امر نه کوي او یا خپله له اسراییلو سره نه جنګیږي.
د افغانستان لپاره د ایران ځانګړي استازي حسن قمي کاظمي په دې وروستیو کې د ایران له یوې دولتي خبري شبکې سره په مرکه کې ویلي، چې د اړتیا په صورت کې به له فلسطینيانو څخه د دفاع په موخه له افغانستان نه غزې ته د «استشهادي ځواکونو یو لښکر» ولاړ شي.
د ایران استازی، طالبان په سیمه کې د «مقاومت د محور» برخه ګڼي.
د مقاومت محور هغه اصطلاح ده چې ایران یې په منځني ختیځ کې د خپلو نیابتي ځواکونو د ستایلو لهپاره کاروي.
دغه ځواکونه پر امریکايي اډو او د اسراییلو پر خاوره راکټي بریدونه کوي.
المرصاد رسنۍ چې د طالبانو په استخباراتو پورې اړه لري، د پنجشنبې په ورځ - د سلواغې ۱۹مه - د کاظمي قمي د څرګندونو په غبرګون کې لیکلي، "ایران او اسراییل دواړه هڅه کوي چې هلته [غزه] کې سني عربان له منځه یوسي.
المرصاد په دوام کې لیکلي «ایران په عراق کې څه کوي؟ ایران کوم کسان په سوریه کې وژني او ایران په یمن کې څه وکړل؟»
دغه رسنۍ همداراز زیاتوي، د فلسطین مسله په حقیقت کې د ټولو مسلمانو ملتونو مسله ده مطلب کې راغلياو چې باید په ګډه پرې پریکړه وشي، خو په منځني ختیځ کې د ایران ناکامه سیاست دغه سیمه له جدي ګواښ سره مخ کړې ده.
دغې طالب رسنۍ زیاته کړې، چې "ایران هلته له شیعه لږکیو سره مرسته کوي چې ځواکمن شي او سیمه د ایران تر نفوذ لاندې راشي، دې سیاست د ایران او خلیجي هېوادونو اړیکې اغیزمنې کړې دي."
دغې رسنۍ ویلي چې "د فلسطین په جګړه کې د عربي هېوادونو د نه لېوالتیا یو مهم لامل دا دی چې حماس له ایران سره ژورې اړیکې لري".
المرصاد زیاته کړه چې دا د حیرانتیا خبره ده چې د ایران د اسلامي جمهوریت ځواکونه په سوریه او عراق کې سني وګړي وژني، کورونه یې ورانوي، جوماتونه یې ورانوي، [څنګه] د فلسطین دفاع کوي.
د المرصاد د لیکل شوي مطلب په دوام کې راغلي دي: «د قمي څرګندونې ښيي چې افغانستان د مبارزینو مرکز دی چې ډیری یې غیر مسوولانه دي».
دغې وېبپاڼې زیاته کړې، که ایران په سیمه کې خپله ناکامه او مغرضانه سیاست بدله کړي، ښايي هلته نسبي امنیت ټینګ شي او د یوه خپلواک فلسطین د جوړېدو لپاره ګامونه پورته شي.
