په یوه بې ساري اقدام کې امریکا پر توندلارو اسراییلیانو بندیز ولګاوه

په یوه بې ساري اقدام کې، متحده ایالاتو په لویدیځه غاړه کې پر هغو توندلارو اسراییلیانو بندیز ولګاوه چې له فلسطینیانو سره په تاوتریخوالي تورن دي. جو بایډن په اجرایوي فرمان کې لیکلي چې په لویدیځه غاړه کې د ځینو میشتو کسانو کړنې "د متحده ایالاتو ملي امنیت ته ګواښ دی."

د امريکا ولسمشر په خپل فرمان کې څرګنده کړې، چې په لويديځه غاړه کې د ځينې اسراییلي مېنو د اوسېدونکو کړنې د اسراییل او فلسطين د دوو دولتونو د جوړولو د حل په ګډون د امريکا د بهرنۍ تګلارې موخې له خطر سره مخامخ کوي او په دې توګه "د متحده ایالاتو ملي امنیت ته یو ګواښ" استازیتوب کوي.

په ملګرو ملتونو کې د امریکا سفیرې لینډا توماس ګرینفیلډ د اسرایلي ښارګوټو د همدې اوسېدونکو په هکله چې په لویدیځه غاړه کې یې پر فلسطنیانو بریدونه کول، وویل، دغه کسان باید ځواب ویونکي شي او تاوتریخوالی باید ودرول شي.

د عقرب په میاشت کې، بایډن په واشنګټن پوسټ کې په یوه مقاله کې د اسراییل او فلسطیني سیمو دواړو غاړو په ځانګړې توګه د لویدیځې غاړې او غزې تړانګې افراطیانو ته خبرداری ورکړ.

په هغه وخت کې، د متحده ایالاتو ولسمشر ګواښ وکړ چې " هغوافراطیانو ته به چې په لویدیځه غاړه کې پر ملکي وګړو بریدونه کوي د ویزو په ورکولو بندیز ولګوي".

هغه لیکلي چې په لوېدیځه غاړه کې د فلسطینیانو پر ضد باید سخت تاوتریخوالی ودرول شي او له هغو کسانو سره باید حساب وشي چې دا تاوتریخوالی کوي.
​